Собиқ Иттифоқ халқ артисти Алексей Баталов 88 ёшида вафот этди

Собиқ Иттифоқ халқ артисти Алексей Баталов 88 ёшида оламдан ўтди. Бу ҳақда Meduza хабар берди.

Актёрнинг дўсти Владимир Ивановга кўра, Баталов Москвадаги касалхоналардан бирида 15 июнь, пайшанбага ўтар кечаси вафот этди. У жорий йил бошида тос суяги синиб, шифохонага ётқизилган, февралда эса операция қилинганди. 

Алексей Баталов 30 дан ортиқ фильмларда ўйнаган. «Москва кўз ёшларга ишонмайди», «Кучук етаклаган хоним» ва «Турналар учганда» картиналаридаги қаҳрамонлари билан кўпроқ танилганди. 

У узоқ йиллар давомида Бутуниттифоқ кинематография давлат институтида дарс берди, актёрлик маҳорати кафедрасини бошқарди. 

2007—2013 йилларда Россиянинг «Ника» кинематография санъати академияси президенти бўлганди.