ЖЧ—2018. Ўзбекистон ва унинг рақиблари ўртоқлик ўйинларига қандай эътиборда бўлди?

12—13 июнь кунлари ЖЧ—2018 саралашининг «А» гуруҳидан жой олган мамлакатлар 8-тур учрашувида майдонга тушади.

ЖЧ—2018. Саралаш «А» гуруҳи. 8-тур 12 июнь, душанба

Эрон — Ўзбекистон

13 июнь, сешанбаСурия — ХитойҚатар — Жанубий Корея

Эрон — Ўзбекистон

Цикл якунига яна 3 та тур қолгани инобатга олинса, 8-турдан кейин бир қатор масалалар ўз ечимини топиши мумкин. Биринчи галда эътибор Эрон термасига қаратилади. Форслар Ўзбекистонни мағлуб этиб, Россия мундиали учун чиптани муддатидан олдинроқ ҳал қилиш имкониятига эга.12 июнь кунги беллашув Тошкент вақти билан 21:45 да старт олади. Бу Рамазон ойининг давом этаётгани билан боғлиқ ҳолат. Учрашувнинг «Озоди» стадионида ўтиши, ўзбекистонликларга яхшигина босим бўлиши ката эҳтимол. Кейруш жамоаси учун тарихийга айланиши кутилаётган беллашувни томоша қилиш истагида бўлганлар, табиийки, стадионни тўлдиради.

Португалиялик мутахассис Ўзбекистонга қарши тайёргарликни ҳаммадан олдинроқ бошлаб, ҳатто таркибга жалб этилган футболчилар номига ҳам ойдинлик киритиб бўлганди (Самвел Бабаян салкам бир ойдан кейин «тилга кирди»). Тайёргарлик Австрияда олиб борилди. Делегация 4 июнь куни Подгорица шаҳрида Черногорияга қарши саф тортиб, 2:1 ҳисобида зафар қучди.

4 июнь, якшанба

Черногория — Эрон 1:2

Голлар: Сардор Азмун, 10 (0:1). Стеван Йоветич, 32 (1:1). Сардор Азмун, 60 (1:2).Четлатиш: Муртазо Пурлиганжий, 81 (Э).

Черногория: Даниел Петкович — Небойся Косович, Марко Янкович, Стеван Йоветич, Зарко Томасевич, Фатош Бечирай, Вукан Савичевич, Стефан Савич, Эмраҳ Климента, Владимир Йовович, Марко Шимич.

Эрон: Алиризо Бийронванд — Рамин Ризоиён, Муртазо Пуралиганжий, Пежман Мунтазирий, Саид огаҳий, Саид Иззатуллоҳий (Иззатуллоҳ Пургаз, 75), Эҳсон Ҳожсафий (Али Каримий, 38), Ашкан Дежага (Ризо Ғучаннажод, 46), Меҳди Туробий, Карим Ансарифард (Милад Муҳаммадий, 46), Сардор Азмун (Эҳсон Паҳлавон, 66).

Нега айнан Черногория?

Шарқий Осиё мамлакатлари ёки Форз кўрфази атрофида жойлашган жамоалардан фарқли ўлароқ, Ўзбекистон термаси намойиш қиладиган ўйин Европанинг марказий, шимолий ва шарқий қисмида жойлашган жамоалар ўйинига анчагина ўхшаб кетади. Катта эҳтимол билан форслар бу жиҳатни инобатга олди. Айтайлик, Эрон Озарбайжон, Арманистон ёки Грузия каби термалар билан рақобатлашишни истаса, бунинг уддасидан чиқа оларди. Аммо Кейруш каби ўз олдига юқори мақсад қўядиган мутахассис жамоасига буни раво кўрмади ҳамда юқорида айтилган ўйин услубининг нисбатан ёрқинроқ вакили бўлган Черногорияни танлаб олди.

Сафарда тўп суришига қарамай, форслар Сардор Азмуннинг дубли эвазига 2:1 ҳисобида зафар қучди. Қишда «Севилья» сафига бориб қўшилган ва кетма-кет ўйинларда «Реал» дарвозасига 2 та гол урган Йоветич жавоб голига муаллифлик қилди.

Ўзбекистон терма жамоаси танлаб олган рақибни эса Эронга ўхшатиб бўлмайди. 12 июнь кунги жамоа Индонезия, Вьетнам ёки ҳеч бўлмаганда Гонконг билан дуч келганида эди, Таиланд номзодини тушунса бўларди. Аммо гап Эрон билан ўйин ҳақида кетаётган бир пайтда, Таиланд варианти у қадар мос бўлмаслиги мумкин.

6 июнь, сешанба

Ўзбекистон — Таиланд 2:0

Голлар: Темурхўжа Абдухолиқов, 67 (1:0). Сардор Рашидов, 90+2 (2:0).

Ўзбекистон: Александр Лобанов — Станислав Андреев, Егор Кримец, Отабек Шукуров, Акмал Шораҳмедов, Азиз Ҳайдаров (Мурод Холмуҳаммедов, 81), Вадим Афонин, Сервер Жепаров (Темурхўжа Абдухолиқов, 61), Марат Бикмаев (Сардор Рашидов, 51), Жалолиддин Машарипов (Элдор Шомуродов, 46), Игорь Сергеев (Александр Гейнрих, 65).

Таиланд: Синтхавичаи Хатхаираттакул — Сирод Чаттонг, Кевин Диромрам (Чутипон Тонтай, 61), Панса Хемвибун, Чалермпонг Кердкаев, Нарубадин Вираватнодом (Путтинан Ваннасри, 70), Титипан Пуангжан (Пирадол Чамрасами, 79), Танабун Кесарат, Санрават Дечмитр (Тиратеп Винотай, 61), Бордин Пала (Рунгрут Пумичантук, 82), Нурул Сриянкем.

Сурия — Хитой

Мамлакатдаги беқарор вазиятга қарамай, Сурия терма жамоаси саралаш давомида илиқ таассурот қолдириб келди. Ўзбекистон терма жамоаси мағлуб этилгани, Эрон ва Жанубий Кореяга қарши ўйинларда дурангга эришилгани инобатга олинса, сурияликлар плей-оффга йўлланма берувчи 3-поғонадан умидини узмаган.

Хитойга қарши сафар ўйинида Сурия 1:0 ҳисобида ғолиб чиққан. 13 июнь куни буни Малайзияда ҳам такрорлашнинг имкони бор. Мазкур беллашув Ўзбекистон терма жамоаси учун катта аҳамият касб этади. Боиси айнан шу икки мамлакат Самвел Бабаяндан 3-ўринни тортиб олиш учун даъвогар ҳисобланади.

Сурия Хитойга қарши ўйин олдидан Японияда меҳмон бўлди ва 1:1 ҳисобидаги дуранг натижага имзо чекди. Япония, Эрон, Жанубий Корея билан бемалол дуранг ўйнайдиган, истаса Ўзбекистонни мағлуб эта оладиган жамоада потенциал кўриниб турибди. Хитой билан ўйин олдидан Япониянинг танлаб олингани уй учрашувларини ўз майдонида ўтказа олмайдиган Сурия термаси-да бўлажак ўйинларга тайёргарлик масаласига жиддий эътибор қаратганини кўрсатади.

7 июнь, чоршанба

Япония — Сурия 1:1

Голлар: Мардик Мардикиан, 48 (0:1). Конно, 59 (1:1).

Марчелло Липпи мураббийлик қилаётган Хитой эса спаринг рақиб сифатида Филиппин термасини танлади. Бу билан италиялик мутахассис жамоа ўйинини шакллантиришни мақсад қилиб олган бўлса, ажаб эмас. Тайёргарлиги яхши ўтган жамоа мураббийлари жиддий тўқнашув олдидан кучсизроқ рақибни танлаб олиши ҳолатлари кўп кузатилади. Бунда асосий футболчиларнинг жароҳат олиши эҳтимоли камаяди, йирик ғалаба эса футболчилар кайфиятини кўтариш учун хизмат қилади.

Шу ўринда Самвел Бабаян ҳам шуни режалаштирган бўлиши мумкин-ку деган савол келиб чиқади. Терма жамоалар маркази Таиланд вариантида рақиб йўқлигидан келиб чиқиб тўхталгани ката эҳтимол. Келишув осонлик билан амалга ошмади. Қолаверса, Хитой термаси январь ойида Исландия, Чили ва Хорватия иштирокидаги турнирда иштирок этган бўлиб, Липпи бунда жамоа асосини белгилаб олган ва шогирдларини жиддий рақибларга қарши учрашувларда синовдан ўтказиб бўлганди. Бу вақтда Ўзбекистон термаси Арманистон жамоалари, Дания ёшлари, Грузия каби рақибларга қарши иккинчи таркиб футболчилари билан ўйин ўтказиб юрганди.

7 июнь, чоршанба

Хитой — Филиппин 8:1

Голлар: Рен Ҳанг, 4 (1:0). Дзи Хиао, 26 (2:0). Мисаг Баҳодиран, 33 (2:1). Ю Ҳанчао, 44 (3:1). Янгпо Ванг, 54 (4:1). Йин Ҳангбо, 57 (5:1). Дзанг Хизе, 67-пен (6:1). Ҳанвен Денг, 72 (7:1). Денг Ҳангвен, 90 (8:1).

Қатар — Жанубий Корея

Расмий ўйин олдидан спаринг рақиб танлашда Қатар ва Жанубий Корея термалари ҳам мантиқ масаласини биринчи планга олиб чиққанини кўриш мумкин. Бунда қатарликлар Доҳага КХДРни таклиф қилди. Қўшимча изоҳга ҳожат йўқ.

Жанубий Корея эса Қатарга анчагина ўхшаб кетадиган Ироқ билан Амирликларда куч синашди. Бунда фақатгина рақиб эмас, бир-биридан фарқ қилмайдиган БАА ва Қатар иқлими ҳам ҳисобга олинганини кўриш мумкин.

6 июнь, сешанба

Қатар — КХДР 2:2

Голлар: Абдулкарим Ҳассан, 32 (1:0). Али Афиф, 56 (2:0). Ким Ю Сунг, 63 (2:1). Ким Ю Сунг, 73 (2:2).Четлатиш: Абдулкарим Ҳассан, 88 (Қ).

7 июнь, чоршанба

Ироқ — Жанубий Корея 0:0

Ўз-ўзидан қарама-қарши гуруҳдаги жамоаларга ҳам эътибор беринг. Ироқ бўлажак рақиби Япония бўлгани учун ҳам, Жанубий Корея варианти энг идеали эди. Ироқ билан ўйнайдиган Япония нима сабабдан Сурияга қарши учрашувга рози бўлганини сизга тушунарли.

БАА Таиланд билан ўйин олдидан Лаосни танлаб олди, Таиланд эса даражаси БААга анча яқин бўлган Ўзбекистонга келди.

Австралия ва Саудия Арабистони термалари ўртоқлик ўйини ўтказмади. Бунинг учун уларда фурсат анча кам эди. Австралия термасининг Конфедерациялар кубогида иштирок этиши инобатга олиниб, ЖЧ саралашидан жой олган беллашув 8 июнга кўчирилган. Бугун ҳар икки терма Аделаида шаҳрида саф тортади. Уларнинг Саудияда бўлиб ўтган биринчи учрашувида 2:2 ҳисоби қайд этилганди.