JCh—2018. O‘zbekiston va uning raqiblari o‘rtoqlik o‘yinlariga qanday e’tiborda bo‘ldi?

12—13-iyun kunlari JCh—2018 saralashining “A” guruhidan joy olgan mamlakatlar 8-tur uchrashuvida maydonga tushadi.

JCh—2018. Saralash “A” guruhi. 8-tur 12-iyun, dushanba

Eron — O‘zbekiston

13-iyun, seshanbaSuriya — XitoyQatar — Janubiy Koreya

Eron — O‘zbekiston

Sikl yakuniga yana 3 ta tur qolgani inobatga olinsa, 8-turdan keyin bir qator masalalar o‘z yechimini topishi mumkin. Birinchi galda e’tibor Eron termasiga qaratiladi. Forslar O‘zbekistonni mag‘lub etib, Rossiya mundiali uchun chiptani muddatidan oldinroq hal qilish imkoniyatiga ega.12-iyun kungi bellashuv Toshkent vaqti bilan 21:45 da start oladi. Bu Ramazon oyining davom etayotgani bilan bog‘liq holat. Uchrashuvning “Ozodi” stadionida o‘tishi, o‘zbekistonliklarga yaxshigina bosim bo‘lishi kata ehtimol. Keyrush jamoasi uchun tarixiyga aylanishi kutilayotgan bellashuvni tomosha qilish istagida bo‘lganlar, tabiiyki, stadionni to‘ldiradi.

Portugaliyalik mutaxassis O‘zbekistonga qarshi tayyorgarlikni hammadan oldinroq boshlab, hatto tarkibga jalb etilgan futbolchilar nomiga ham oydinlik kiritib bo‘lgandi (Samvel Babayan salkam bir oydan keyin “tilga kirdi”). Tayyorgarlik Avstriyada olib borildi. Delegatsiya 4-iyun kuni Podgoritsa shahrida Chernogoriyaga qarshi saf tortib, 2:1 hisobida zafar quchdi.

4-iyun, yakshanba

Chernogoriya — Eron 1:2

Gollar: Sardor Azmun, 10 (0:1). Stevan Yovetich, 32 (1:1). Sardor Azmun, 60 (1:2).Chetlatish: Murtazo Purliganjiy, 81 (E).

Chernogoriya: Daniyel Petkovich — Neboysya Kosovich, Marko Yankovich, Stevan Yovetich, Zarko Tomasevich, Fatosh Bechiray, Vukan Savichevich, Stefan Savich, Emrah Klimenta, Vladimir Yovovich, Marko Shimich.

Eron: Alirizo Biyronvand — Ramin Rizoiyon, Murtazo Puraliganjiy, Pejman Muntaziriy, Said ogahiy, Said Izzatullohiy (Izzatulloh Purgaz, 75), Ehson Hojsafiy (Ali Karimiy, 38), Ashkan Dejaga (Rizo G‘uchannajod, 46), Mehdi Turobiy, Karim Ansarifard (Milad Muhammadiy, 46), Sardor Azmun (Ehson Pahlavon, 66).

Nega aynan Chernogoriya?

Sharqiy Osiyo mamlakatlari yoki Forz ko‘rfazi atrofida joylashgan jamoalardan farqli o‘laroq, O‘zbekiston termasi namoyish qiladigan o‘yin Yevropaning markaziy, shimoliy va sharqiy qismida joylashgan jamoalar o‘yiniga anchagina o‘xshab ketadi. Katta ehtimol bilan forslar bu jihatni inobatga oldi. Aytaylik, Eron Ozarbayjon, Armaniston yoki Gruziya kabi termalar bilan raqobatlashishni istasa, buning uddasidan chiqa olardi. Ammo Keyrush kabi o‘z oldiga yuqori maqsad qo‘yadigan mutaxassis jamoasiga buni ravo ko‘rmadi hamda yuqorida aytilgan o‘yin uslubining nisbatan yorqinroq vakili bo‘lgan Chernogoriyani tanlab oldi.

Safarda to‘p surishiga qaramay, forslar Sardor Azmunning dubli evaziga 2:1 hisobida zafar quchdi. Qishda “Sevilya” safiga borib qo‘shilgan va ketma-ket o‘yinlarda “Real” darvozasiga 2 ta gol urgan Yovetich javob goliga mualliflik qildi.

O‘zbekiston terma jamoasi tanlab olgan raqibni esa Eronga o‘xshatib bo‘lmaydi. 12-iyun kungi jamoa Indoneziya, Vyetnam yoki hech bo‘lmaganda Gonkong bilan duch kelganida edi, Tailand nomzodini tushunsa bo‘lardi. Ammo gap Eron bilan o‘yin haqida ketayotgan bir paytda, Tailand varianti u qadar mos bo‘lmasligi mumkin.

6-iyun, seshanba

O‘zbekiston — Tailand 2:0

Gollar: Temurxo‘ja Abduxoliqov, 67 (1:0). Sardor Rashidov, 90+2 (2:0).

O‘zbekiston: Aleksandr Lobanov — Stanislav Andreyev, Yegor Krimets, Otabek Shukurov, Akmal Shorahmedov, Aziz Haydarov (Murod Xolmuhammedov, 81), Vadim Afonin, Server Jeparov (Temurxo‘ja Abduxoliqov, 61), Marat Bikmayev (Sardor Rashidov, 51), Jaloliddin Masharipov (Eldor Shomurodov, 46), Igor Sergeyev (Aleksandr Geynrix, 65).

Tailand: Sintxavichai Xatxairattakul — Sirod Chattong, Kevin Diromram (Chutipon Tontay, 61), Pansa Xemvibun, Chalermpong Kerdkayev, Narubadin Viravatnodom (Puttinan Vannasri, 70), Titipan Puangjan (Piradol Chamrasami, 79), Tanabun Kesarat, Sanravat Dechmitr (Tiratep Vinotay, 61), Bordin Pala (Rungrut Pumichantuk, 82), Nurul Sriyankem.

Suriya — Xitoy

Mamlakatdagi beqaror vaziyatga qaramay, Suriya terma jamoasi saralash davomida iliq taassurot qoldirib keldi. O‘zbekiston terma jamoasi mag‘lub etilgani, Eron va Janubiy Koreyaga qarshi o‘yinlarda durangga erishilgani inobatga olinsa, suriyaliklar pley-offga yo‘llanma beruvchi 3-pog‘onadan umidini uzmagan.

Xitoyga qarshi safar o‘yinida Suriya 1:0 hisobida g‘olib chiqqan. 13-iyun kuni buni Malayziyada ham takrorlashning imkoni bor. Mazkur bellashuv O‘zbekiston terma jamoasi uchun katta ahamiyat kasb etadi. Boisi aynan shu ikki mamlakat Samvel Babayandan 3-o‘rinni tortib olish uchun da’vogar hisoblanadi.

Suriya Xitoyga qarshi o‘yin oldidan Yaponiyada mehmon bo‘ldi va 1:1 hisobidagi durang natijaga imzo chekdi. Yaponiya, Eron, Janubiy Koreya bilan bemalol durang o‘ynaydigan, istasa O‘zbekistonni mag‘lub eta oladigan jamoada potensial ko‘rinib turibdi. Xitoy bilan o‘yin oldidan Yaponiyaning tanlab olingani uy uchrashuvlarini o‘z maydonida o‘tkaza olmaydigan Suriya termasi-da bo‘lajak o‘yinlarga tayyorgarlik masalasiga jiddiy e’tibor qaratganini ko‘rsatadi.

7-iyun, chorshanba

Yaponiya — Suriya 1:1

Gollar: Mardik Mardikian, 48 (0:1). Konno, 59 (1:1).

Marchello Lippi murabbiylik qilayotgan Xitoy esa sparing raqib sifatida Filippin termasini tanladi. Bu bilan italiyalik mutaxassis jamoa o‘yinini shakllantirishni maqsad qilib olgan bo‘lsa, ajab emas. Tayyorgarligi yaxshi o‘tgan jamoa murabbiylari jiddiy to‘qnashuv oldidan kuchsizroq raqibni tanlab olishi holatlari ko‘p kuzatiladi. Bunda asosiy futbolchilarning jarohat olishi ehtimoli kamayadi, yirik g‘alaba esa futbolchilar kayfiyatini ko‘tarish uchun xizmat qiladi.

Shu o‘rinda Samvel Babayan ham shuni rejalashtirgan bo‘lishi mumkin-ku degan savol kelib chiqadi. Terma jamoalar markazi Tailand variantida raqib yo‘qligidan kelib chiqib to‘xtalgani kata ehtimol. Kelishuv osonlik bilan amalga oshmadi. Qolaversa, Xitoy termasi yanvar oyida Islandiya, Chili va Xorvatiya ishtirokidagi turnirda ishtirok etgan bo‘lib, Lippi bunda jamoa asosini belgilab olgan va shogirdlarini jiddiy raqiblarga qarshi uchrashuvlarda sinovdan o‘tkazib bo‘lgandi. Bu vaqtda O‘zbekiston termasi Armaniston jamoalari, Daniya yoshlari, Gruziya kabi raqiblarga qarshi ikkinchi tarkib futbolchilari bilan o‘yin o‘tkazib yurgandi.

7-iyun, chorshanba

Xitoy — Filippin 8:1

Gollar: Ren Hang, 4 (1:0). Dzi Xiao, 26 (2:0). Misag Bahodiran, 33 (2:1). Yu Hanchao, 44 (3:1). Yangpo Vang, 54 (4:1). Yin Hangbo, 57 (5:1). Dzang Xize, 67-pen (6:1). Hanven Deng, 72 (7:1). Deng Hangven, 90 (8:1).

Qatar — Janubiy Koreya

Rasmiy o‘yin oldidan sparing raqib tanlashda Qatar va Janubiy Koreya termalari ham mantiq masalasini birinchi planga olib chiqqanini ko‘rish mumkin. Bunda qatarliklar Dohaga KXDRni taklif qildi. Qo‘shimcha izohga hojat yo‘q.

Janubiy Koreya esa Qatarga anchagina o‘xshab ketadigan Iroq bilan Amirliklarda kuch sinashdi. Bunda faqatgina raqib emas, bir-biridan farq qilmaydigan BAA va Qatar iqlimi ham hisobga olinganini ko‘rish mumkin.

6-iyun, seshanba

Qatar — KXDR 2:2

Gollar: Abdulkarim Hassan, 32 (1:0). Ali Afif, 56 (2:0). Kim Yu Sung, 63 (2:1). Kim Yu Sung, 73 (2:2).Chetlatish: Abdulkarim Hassan, 88 (Q).

7-iyun, chorshanba

Iroq — Janubiy Koreya 0:0

O‘z-o‘zidan qarama-qarshi guruhdagi jamoalarga ham e’tibor bering. Iroq bo‘lajak raqibi Yaponiya bo‘lgani uchun ham, Janubiy Koreya varianti eng ideali edi. Iroq bilan o‘ynaydigan Yaponiya nima sababdan Suriyaga qarshi uchrashuvga rozi bo‘lganini sizga tushunarli.

BAA Tailand bilan o‘yin oldidan Laosni tanlab oldi, Tailand esa darajasi BAAga ancha yaqin bo‘lgan O‘zbekistonga keldi.

Avstraliya va Saudiya Arabistoni termalari o‘rtoqlik o‘yini o‘tkazmadi. Buning uchun ularda fursat ancha kam edi. Avstraliya termasining Konfederatsiyalar kubogida ishtirok etishi inobatga olinib, JCh saralashidan joy olgan bellashuv 8-iyunga ko‘chirilgan. Bugun har ikki terma Adelaida shahrida saf tortadi. Ularning Saudiyada bo‘lib o‘tgan birinchi uchrashuvida 2:2 hisobi qayd etilgandi.