Қатар ҳукумати Ироқ жанубида қўлга олинган қироллик оиласи аъзоларини асирликдан озод қилиш учун халқаро террорчиларга юзлаб миллион доллар тўлаган. Бу ҳақда Financial Times дала қўмондонлари ва минтақадаги маъмурий шахсларга таяниб хабар берди.
Нашр таъкидлашича, «олди-сотди» апрелда бўлиб ўтган. Пул лочин ови чоғида гаровга олинган 26 кишини ҳамда Суриядаги жиҳодчилар томонидан қўлга олинган 50 ҳарбийни озод қилиш учун сарфланган.
Расмий Доҳа террорчилар қўллаб-қувватланганини рад этмоқда, аммо амирлик ҳукуматига яқин манба газетага маълум суммадаги пуллар ўтказиб берилганини тасдиқлади. Озод этиш бўйича музокараларда қатнашган иккала томондан манбалар ҳам таъкидлашича, 200 дан 300 миллион долларгача бўлган маблағ аввалроқ «Жабҳат ан-Нусра» сифатида таниқли бўлган «Таҳрир аш-Шом» гуруҳига тўланган.
Эслатиб ўтамиз, 5 июнь куни Саудия Арабистони, Миср, Баҳрайн ва БАА террорчилик ташкилотларини қўллаб-қувватлагани учун Қатар билан дипломатик алоқаларини узган эди. Уларнинг қарорига кейинроқ Яман, Ливия, Малдив Республикаси ва Маврикий ҳам қўшилди.