“Товар ва молия бозорларида монополияга қарши тартибга солишга доир норматив-ҳуқуқий ҳужжатларни тасдиқлаш тўғрисида”ги Вазирлар Маҳкамаси қарори қабул қилинди.
Ҳужжат билан Хўжалик юритувчи субъектларни мажбурий тарзда бўлиш ёки ажратиб чиқариш тартиби тўғрисидаги низом тасдиқланди. Низом товар ёки молия бозорида устун мавқени эгаллаб турган хўжалик юритувчи субъектларга татбиқ этилади. Низом табиий монополиялар субъектларига татбиқ этилмайди.
Мажбурий тарзда бўлиш ёки ажратиб чиқариш рақобат тўғрисидаги қонунчилик бузилишларини бартараф этиш юзасидан илгари қўлланилган чоралар самарасиз бўлган тақдирда амалга оширилади.
Махсус комиссиянинг қарорига асосан монополияга қарши курашиш органи томонидан иқтисодий судга тегишли даъво аризаси киритилади.
Мажбурий тарзда бўлиш ёки ажратиб чиқариш тўғрисидаги қарор бажарилмаган тақдирда монополияга қарши курашиш органининг даъво аризасига асосан суд томонидан хўжалик юритувчи субъектга бошқарувчи тайинланади.
Ҳужжат Қонун ҳужжатлари маълумотлари миллий базасида эълон қилинган ва 2024 йил 2 майдан кучга кирди.
Ўзбекистонда 2022 йилнинг биринчи чорак якунларига кўра, 97 та компания товар ёки молия бозорида устун мавқега эга (улуши 35 фоиздан ортиқ бўлган компаниялар) экани маълум бўлганди. Рўйхатдаги аксарият компаниялар давлатга тегишли ёки давлат улушига эга — UzAutoMotors, “Ўзбекнефтгаз”, “Ўзбектелеком” ва бошқа компаниялардир.
Изоҳ (0)