Уч йилдан буён Россиянинг «Биринчи канали»да «Доброе утро» кўрсатувига бошловчилик қилиб келаётган ўзбекистонлик Дилбар Файзиева «Москва-Баку» нашрига интервью бериб, аспирантурадаги ўқиши, журналистика соҳасига қандай кириб қолгани, Москвага қандай одатларни олиб келгани, гўшт емаслиги ҳақида гапириб берди, шунингдек, Ўзбекистонга сафар қилмоқчи бўлган саёҳатчиларга маслаҳатлар берди.
Дилбар бошловчилик билан бирга Москва давлат университети аспирантурасида таълим олмоқда. «Ҳозирда бошловчиларнинг имижини бутун телеканалнинг жозибадорлигини оширувчи омил сифатида ўрганиш билан шуғулланмоқдаман… Менга ўз ишимни ижтимоий-психологик нуқтаи назардан тадқиқ қилиш ёқади», — деди у.
Журналистика соҳасига қандай кириб қолгани ҳақида гапирар экан, доим «характерли» қиз бўлганини қайд этди. «Журналистика — итоаткор шарқ аёли учун унчалик мос бўлмаган касб. Қариндошларим бу танловимни дарҳол қабул қила олишмади, аммо ҳозир ўз йўлимдан кетганим учун хурсандлар ва энди доим қўллаб-қувватлашади», — деди Дилбар.
Шунингдек, бошловчи Ўзбекистондан Москвага келгач, бу ердаги баъзи одатларга кўника олмагани ҳақида сўзлаб берди. «Москвага кўчиб келгач, катта ёшдаги одамлар билан ‘сен’лаб гаплашишга қийналдим. Кўпчилик ҳатто мендан хафа бўларди, бунга кўникишимга тўғри келди, ахир одамларнинг танловини ҳурмат қилиш керак. Аммо мен ота-онамдан катталарни ҳурмат қилишни ўргатишгани учун миннатдорман», — деди у.
«Ўзбекистонга отланаётган сайёҳларга қандай маслаҳатлар берасиз?» — деган саволга Дилбар Ўзбекистоннинг иқлимидан келиб чиқиб, у ерда овқатдан сўнг муздек сув ёки ичимликлар ўрнига, ўзбекистонликлар анъанасига кўра, иссиққина кўк чой ичишни тавсия қилди.
Бундан ташқари, Дилбар бир неча йиллардан буён гўшт истеъмол қилмаслиги — вегетариан эканлигини қайд этди. Шунга қарамай, у турли овқатларни пиширишга уста: июнь ойида у ўз пазандалик блогини очмоқчи, у ерда ҳам вегетарианлар, ҳам гўштхўрлар учун кўплаб қизиқарли рецептлар бўлади, дейди Дилбар.