Россиялик мухолиф сиёсатчи Алексей Навальний бизнесмен Алишер Усмоновнинг даъвоси бўйича суд қарорини бажармаслигини маълум қилди. Бу ҳақда у ўз сайтига жойлаштирилган видеомурожаатда айтиб ўтди, деб хабар беради «ТАСС».
«Энди сен, Алексей, суд қарорини ижро этасанми, деган саволга жавоб бераман. Албатта, йўқ. Мен суд қарорини тан олмайман ва умуман буни суд деб тан олмайман», — деди сиёсатчи.
Бунга асос сифатида Навальний суд унинг 22–23 даъвосини қайтарганини, гувоҳларни чақиришдан ва ҳужжатларни далиллар қаторига қўшишдан бош тортганини келтириб ўтди.
31 май куни суд Усмоновнинг Коррупцияга қарши кураш жамғармасига қарши даъвосини қондириб, Навальний ўн кун ичида бизнесменнинг коррупцияга алоқадорлиги ҳақидаги баёнотларини инкор қилиши ва ўчириши, уч ой ичида раддияни чоп этишини белгилади.