Ўзбекистон Президенти Шавкат Мирзиёевнинг 6 май куни пойтахтнинг Яшнобод туманига ташрифидан сўнг «Ватандош» маҳалласи кўчалари, кўп қаватли уйлар атрофи ободонлаштирилди. Боғча, мактаб, коллеж, оилавий поликлиника, тиббий диспансерда кўплашиб ҳашар ўтказилди. Кўп қаватли уйларнинг йўлак ва том қисмлари тозаланиб, таъмирдан чиқарилди, деб ёзади ЎзА.
Давлат раҳбари Яшнобод туманига келганидан сўнг қисқа фурсатда кўркам гузар барпо этилди. Республика «Маҳалла» хайрия жамоат фонди ҳамда туман ҳокимлиги кўмагида миллий ва жаҳон адабиётининг сара намуналаридан иборат мўъжаз кутубхона ташкил этилди. «Гўзаллик салони», либослар ательеси, новвойхона қурилиб, фойдаланишга топширилди. Тез орада қишлоқ хўжалиги маҳсулотлари савдо шохобчаси ишга тушиши ҳам кутилмоқда.
Маҳалла фаолларининг ёрдами билан олтмиш нафардан ортиқ одам ишли бўлди. ЎзАнинг қайд этишича, узоқ йиллар мобайнида ўндан ортиқ жон каталакдек уйда тиқилиб яшаётган хонадон аъзоларига уй-жой олиш бўйича ҳужжатлар расмийлаштиришга кўмаклашилди. Кўп қаватли уйларга ўрнатилган кузатув камералари турли ножўя хатти-ҳаракатлар, жиноятчиликнинг олдини олмоқда.
Ёлғиз, бемор кексалар, алоҳида эҳтиёжли фуқароларнинг ҳолидан хабардор бўлиш, оила ажралишларининг олдини олиш, ёшларни турли хатарли ғоялар, иллатлар таъсиридан асраш, доимо огоҳ ва ҳушёр бўлишни фаолиятимизнинг энг асосий йўналишига айлантирганмиз.Феруза Маҳмудова, «Ватандош» маҳалласининг диний маърифат ва маънавий-ахлоқий тарбия масалалари бўйича маслаҳатчисиЎзА бу каби ишлар «Бирлашган», «Тонг», «Шоҳимардон», «Амир Темур», «Парвоз», «Олмос», «Дилбоғ», «Жарқўрғон», «Фазогир», «Беҳизор» сингари кўплаб маҳаллаларда ҳам кузатиш мумкинлигини таъкидлади.
Изоҳ (0)