«Катта еттилик» давлатлари киберҳужумларга қарши биргаликда кураш ҳақида келишиб олади

G7 давлатлари молия вазирлари 13 май, шанба куни Италиянинг Бари шаҳридаги учрашувлари давомида халқаро киберҳужумларга қарши биргаликда кураш услублари ҳақида келишиб олади. Бу ҳақда «Коммерсантъ» хабар берди.

«Мазкур услублар молия тизимида заиф нуқталарни тезлик билан аниқлаш бўйича ҳамкорликдаги чоралар ва барча молиявий институтларнинг киберхавфсизлигини таъминлашни назарда тутади. Киберҳужумлар иқтисодиётлар учун тобора жиддий хавф туғдираётганлигини тан оламиз, шу сабабли умумий иқтисодий жавоб сиёсатини ишлаб чиқиш зарур», — дейилади учрашув дастури лойиҳасида.

Италия молия вазири Пера Карло Падоанга кўра, 12 май, жума куни кечки пайт амалга оширилган киберҳужумдан аввал режалаштирилган ушбу кун тартиби «афсуски, жуда долзарб бўлиб чиқди».

Эслатиб ўтамиз, кенг кўламли хакерлик ҳужумига АҚШ, Россия, Буюк Британия, Хитой, Италия каби дунёнинг 70 дан ортиқ давлати, жумладан, Ўзбекистон ҳам дуч келди.