«Юнайтед»ни ким мағлуб этади? Моуриньо 24 мағлубиятсиз серия билан клуб рекордини такрорлади

Англиянинг «Манчестер Юнайтед» футбол клуби АПЛ 26-туридан қолиб кетган ўйинда «Манчестер Сити»га қарши майдонга тушиб, 0:0 ҳисобида дуранг ўйнади.

Бу «Юнайтед»нинг АПЛдаги кетма-кет 24 учрашувни мағлубиятсиз ўтказганини билдиради. Натижада Моуриньо бошқарувидаги клуб «Юнайтед» рекордини такрорлади, деб ёзди «Sports.ru».

«Манкунианлар» сўнгги бор 2016 йилнинг 23 октябрь куни «Челси»дан 0:4 ҳисобида мағлубият қабул қилиб олганди. Шундан кейин Жозе Моуриньо шогирдлари мағлубиятсиз серияни бошлаб юборди.

Айни пайтда «Манчестер Юнайтед» мавсум давомида бор-йўғи уч бор мағлуб бўлган икки клубдан бири бўлиб турибди («Тоттенҳэм»да ҳам учта мағлубият). Дуранг қайд этиш борасида эса «Юнайтед» яққол етакчи — 13 марта.

АПЛ доирасида «қизил иблислар» навбатдаги беллашувни 30 апрель куни «Суонси»га қарши ўтказади. «Олд Траффорд»даги ўйинда ҳам «Юнайтед» мағлуб бўлмаса, «Сити»га қарши ўйиндан кейин такрорланган рекорд бир йўла янгиланади.