Туркия президенти Ражаб Тоййиб Эрдўғон Риза шаҳрида бўлиб ўтган намойишдаги нутқида Европадаги ҳамюртларини конституцияга ўзгартириш киритиш бўйича референдумда иштирок этиб, шу орқали «нацистлар набираларига жавоб бериш»га чақирди, деб хабар беради «ТАСС».
«Биз уч-беш нафар европалик фашистнинг шаънимизни оёқости қилишига йўл қўймаймиз. Қаршиликларга қарамай, ҳамюртларимиз жуда фаол овоз бермоқда. Нацистлар набираларига жавобини беринглар», — деди Туркия президенти.
Эрдўғон «Европадаги айрим етакчилар, афсуски, террорчилик ташкилотларини қўллаб-қувватлаётган»ини ҳам таъкидлаб, Швейцариядаги курдлар намойишини ёдга солди. Ушбу намойишда Эрдўғоннинг бошига тўппонча тиралган расми кўрсатилган эди.
«Европа Иттифоқи мамлакатлари етакчилари Ватиканга бормоқда. Бироқ бундай вақтда уларнинг Ватиканда қандай иши бўлиши мумкин? Ватиканнинг Европа Иттифоқи билан қандай иши бор? Уларнинг бари бир миллатга айланиб, Туркияни Европа Иттифоқига киритмаслик учун қўлидан келган барча нарсани қилмоқда», — деди президент.
«Дарё»нинг Telegram’даги расмий канали — @toshqindaryo’га аъзо бўлинг!