АҚШ Яқин Шарқ авиақатновларига қўйган тақиқидан сўнг, Etihad Airways самолётда планшет тарқата бошлади

Etihad Airways авиакомпанияси АҚШ авиақатновларида ўз йўловчиларига бепул планшет ҳамда Wi-Fi таклиф қилишни бошлади. Бу ҳақида «Коммерсантъ» хабар берди.

Айни вақтда бепул планшет ҳамда Wi-Fi’дан бизнес-класс ва биринчи класс йўловчиларнинг барчаси фойдаланиши мумкин, шунингдек, талабга кўра салондаги исталган жойга етказиб берилади.

Бирлашган Араб Амирликларининг бошқа бир — Emirates авиакомпанияси эса АҚШга учаётган йўловчиларга ноутбук тақдим этиш имкониятларини ўрганиб чиқмоқда.

Emirates президенти Тим Кларкнинг сўзларига кўра, авиакомпания АҚШнинг техника борасидаги тақиқи узоқ вақт давом этадиган бўлса, уни енгиллаштиришнинг турли йўлларини ўрганиб чиқади. Бундай чоралар тақиқ сабабли АҚШ авиақатновларига бўлган талаб камайиб кетсагина қўлланилиши мумкин.

Тим Кларк АҚШ томони мазкур тақиқни фақат Яқин Шарқ авиақатновларига қўйганини танқид қилди. Унинг фикрича, хавфсизлик учун қабул қилинган бундай қарор авиақатновларнинг барча тармоғида қўлланиши керак.

Аввалроқ, Америка ҳукумати АҚШ ҳудудига парвозларни амалга оширувчи Яқин Шарқ ҳамда Шимолий Африка мамлакатларининг саккизта давлатига самолёт бортида кўплаб электрон ускуналарни ташишни тақиқлаш борасида қарор қабул қилган эди.

«Дарё»нинг Telegram’даги расмий канали — @toshqindaryo’га аъзо бўлинг!