Женева моторшоусида бир қатор янги автомобиль концептлари намойиш этилди. Улардан кўпчилиги яқин вақт ичида оммавий равишда ишлаб чиқарила бошлайди. Қолганлари эса ягона нусхалигича қолади. «Мотор» нашри янги концептларнинг энг қизиқ ва муҳимларини акс эттирган фотожамланмани тақдим этди.
Mercedes-AMG GT Concept
Porsche Panamera’нинг бўлажак рақобатдоши 805 от кучига эга, тўрт литр сиғимли, икки турбинали гибрид двигатель билан жиҳозланган. Тахминан, уч сонияда 100 км/соат тезликка эришади.
Тўрт ўриндиқли машинанинг габарит узунлиги беш метрдан ошади. Автомобиль 2018 йилдан бошлаб ишлаб чиқарилади.
Bentley EXP 12 Speed 6e
Концептуал электр автомобиль аккумуляторни симсиз қувватлаш тизими билан жиҳозланган. Ишлаб чиқарувчи томонидан маълум қилинишича, машина Лондондан Парижгача қувватланмасдан етиб бора олади. Икки шаҳар ўртасидаги масофа қарийб 500 километрни ташкил қилади.
Автомобиль салонида сенсорли OLED дисплей ўрнатилган, шунингдек, салонни жиҳозлашда чарм, мис ва табиий ёғочдан фойдаланилган. Автомобилнинг ишлаб чиқарилиши ҳақида ҳеч қандай маълумот йўқ.
Peugeot Instinct
Намуна тўрт ўриндиқли ҳайдовчисиз автомобиль бўлиб, 300 от кучига эга гибрид кучли двигатель билан жиҳозланган. Машинанинг ўзига хос хусусияти шундаки, унинг пол қисми юпқа бетон қатлам билан қопланган.
Мультимедиа тизими Samsung Artik Cloud’дан фойдаланади ва одамнинг жисмоний ҳолатини аниқлай олади. Агар автомобилнинг электроника тизими ҳайдовчининг «ақлли соати»дан у йўлга чиқишдан олдин спорт машғулотида бўлгани ҳақидаги маълумотни қабул қилса, машинанинг барча функциялари энг қулай ҳаракатни таъминлашга созланади.
Hyundai FE Fuel Cell
Hyundai’нинг келажакдаги водород кроссовери, тахминан, шундай кўринишда бўлади. Концепт бир марта ёқилғи қуйилганидан сўнг 800 километр масофани босиб ўта олади. Автомобиль оммавий равишда 2018 йилдан бошлаб ишлаб чиқарилади.
Infiniti Q60 Black S
Намуна япон компанияси томонидан Формула-1 нинг Renault жамоаси билан ҳамкорликда яратилган. Автоулов гибрид кучли двигатель ва ERS энергия йиғиш тизими билан жиҳозланган.
Формула технологияси туфайли двигатель қуввати 500 от кучигача етиши мумкин. Машина беш сонияда 100 км/соат тезликка эришади.
Hybrid Kinetic Group H600
Седан Hybrid Kinetic Group компаниясининг буюртмасига биноан Pininfarina ательеси томонидан яратилган. Машинанинг ўзига хослиги — двигатель микротурбогенераторга эга.
5,2 метрли седан иккита электромотор ёрдамида ҳаракатланади, батареялар учун энергия микротурбогенераторларда ишлаб чиқарилади. 100 км/соат тезликка эришиш учун 2,9 сония етади. Электр қуввати захираси қарийб 1000 километрга етади.
Fittipaldi EF7 Vision Gran Turismo
Суперкар Fittipaldi Motors буюртмасига асосан, Pininfarina ательеси ва HWA фирмаси томонидан ишлаб чиқилган.
Вазни 1000 килограмм бўлган суперкар 4,8 литр сиғимли саккиз цилиндрга ва 600 от кучига эга олти даражали двигатель билан жиҳозланган.
Vanda Electrics Dendrobium
Кўп сонли ишлаб чиқаришга мўлжалланаётган концепт биринчи Сингапур суперкари ҳисобланади. Машина Williams Advanced Engineering компанияси билан ҳамкорликда яратилган.
Ишлаб чиқариладиган намуналар тўртта электромотор ва литий-ион батареялари билан жиҳозланади. Суперкар 3 сонияда 100 км/соат тезликка эриша олади. Агар концепт ишлаб чиқаришга тақдим этилса, унинг тақдимоти 2020 йилда бўлиши мумкин.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)