Хитойнинг NIO компанияси навбатдаги EVE номли «келажак автомобили»ни тақдим этди. Электр автомобиль мустақил равишда ҳамда ҳайдовчи ёрдамида ҳаракатланади. Йўл давомида ҳайдовчига сунъий интеллектга асосланган борт ёрдамчиси ҳамроҳлик қилади. Автомобиль норасмий равишда «ғилдиракли меҳмонхона» деб номланмоқда. Бу ҳақда Mashable нашрига таяниб, TJournal хабар берди.
Автомобиль салони кўпроқ биринчи даражали самолёт салонига ўхшайди. Машинага олтитагача йўловчи жойлашиши мумкин. Қулайлик учун автомобиль ҳаракатланувчи эшиклар билан жиҳозланган.
Автомобиль ўриндиқлари диванга айланади, йиғма столлар ва шахсий буюмларни сақлаш учун алоҳида бўлинмалар мавжуд. Бунинг барчаси сенсорли панел ёрдамида бошқарилади.
NOMI деб аталувчи борт ёрдамчиси автомобилни ва датчикларни бошқаради, шунингдек, ҳайдовчининг ҳолати ҳақида хабар бериб туради.
Яратувчиларнинг сўзларига кўра, ёрдамчи йўловчиларнинг хоҳишини аниқлаб, унга мос маълумот бериш имкониятига эга. Бунда ҳар қандай катта ойна дисплей вазифасини бажариши мумкин. Ойнада фильм намойиш этиш ёки йўл давомида фойдали маълумотларни кўрсатиш мумкин. У ҳатто тунда йўл давомида кўринадиган юлдузлар ҳақида гапира олади.
Юлдузларни нафақат ойналар орқали, балки панорамали том орқали ҳам томоша қилиш мумкин.
Mashable нашрининг таъкидлашича, EVE оммавий ишлаб чиқариш учун мўлжалланмаган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)