Футбол бўйича Осиё Чемпионлар лигасида Ўзбекистон чемпиони сифатида иштирок этаётган «Локомотив» 2-турга келиб 3 очкони қўлга киритди. Ўз майдонида Амирликларнинг «Ал-Аҳли» клубини қабул қилган «темирйўлчилар» 2:0 ҳисобида зафар қучди.
Учрашувнинг 20-сониясига келибоқ Саламат Қутибоев ҳисобни очишга муваффақ бўлди. Марат Бикмаев томонидан узатиб берилган пасни ўтган мавсумни «Бухоро» сафида ўтказган футболчи голга айлантира олди.
Ўйинни «Спорт» телеканали орқали шарҳлаб борган Мурод Ризаевнинг тахминига кўра, бу гол Чемпионлар лигаси тарихидаги энг тезкори бўлиши мумкин. ОФК расмий сайти бу борада расмий статистикани тақдим этиб улгурмади.
Иккинчи бўлимга келиб Марат Бикмаевнинг ўзи иккинчи голни рақиб дарвозасига урди. Бунда пас Сардор Мирзаев томонидан берилди.
«Локомотив» илк турни Саудияда «Ат-Таавун» клубига қарши ўтказиб, 0:1 ҳисобида имкониятни бой берган бўлса, «Ал-Аҳли» ўз уйида Эроннинг «Истиқлол»и устидан 2:1 ҳисобида зафар қучганди. Шу тариқа гуруҳдаги уч жамоа 3 очкодан жамғарди.
2-турнинг иккинчи ўйини Тошкент вақти билан 20:30 да старт олиб, Теҳронда «Истиқлол» Саудия жамоасини қабул қилади.
Осиё Чемпионлар лигаси «А» гуруҳи. 2-тур 27 февраль, душанба
«Локомотив» (Ўзбекистон) — «Ал-Аҳли» (БАА) 2:0
Голлар: Саламат Қутибоев, 1 (1:0). Марат Бикмаев, 57 (2:0).«Локомотив»: Игнатий Нестеров — Шуҳрат Муҳаммадиев, Ислом Тўхтахўжаев, Муҳаммад Коне, Олег Зотеев (Шерзод Файзиев, 90), Кахи Махарадзе, Тимур Кападзе, Саламат Қутибоев (Қувондиқ Рўзиев, 86), Сардор Мирзаев, Марат Бикмаев, Жалолиддин Машарипов (Ньоре Кризо, 72).
Изоҳ (0)