Европа Чемпионлар лигаси 1/8 финалидан жой олган Португалиянинг «Бенфика» ҳамда Германиянинг «Боруссия Дортмунд» клублари ўртасидаги учрашув 15 февралга ўтар кечаси Тошкент вақти билан 00:45 да старт олади.
Чемпионлар лигаси мусобақасини Ўзбекистонда трансляция қилиш ҳуқуқини қўлга киритган UzReport «ПСЖ» — «Барселона» ўйинига эътибор қаратгани боис, мазкур учрашув мамлакатда олиб берилмайди.
Бу қизиқ!
- «Боруссия Дортмунд» гуруҳ босқичида 21 та гол уриб, ўзига хос рекорд ўрнатди. Бунга қадар гуруҳ босқичида ҳеч бир клубга шунча гол уриш насиб қилмаганди.
- Лиссабондаги ўйинга «Боруссия Дортмунд» Мадриднинг «Реал» клубидан устунроқ бўлгани учун етиб келмоқда. «Бенфика» эса гуруҳ босқичида «Наполи»дан кейин иккинчи бўлиб қолганди.
- Ҳар икки клуб сўнгги бор 1963/64 йилги мавсумда тўқнаш келган бўлиб, шундан кейин бу клубларнинг йўллари ўзаро кесишмаган.
- «Бенфика» сўнгги олти турнирнинг учтасида чорак финалга етиб келиши мумкин, агар дортмундликлар довонидан ўта олса. Ўтган мавсум бу босқичда «Бенфика» Питернинг «Зенит» клубини ҳар икки ўйинда ҳам мағлуб этганди.
- «Бенфика» плей-оффга йўлланма олган 16 клуб орасида энг кам очко тўплагани билан ажралиб туради — 8.
- «Бенфика» Чемпионлар лигасининг ўз майдонида кечган сўнгги 10 та ўйинидан 2 тасида енгилган. Шулардан бири жорий мавсум «Наполи»дан учралган мағлубиятдир — 1:2.
- 1997 йил Чемпионлар лигасида зафар қучган «Боруссия Дортмунд» шу босқичдан ўта олса, сўнгги 10 йилда учинчи бор чорак финалга қадар етиб келган жамоага айланиб олади.
- Дортмундликлар 2016 йилга қадар Португалияда умуман зафар қучмаганди. Шундан кейин улар икки бор — «Порту»ни 1:0 ва «Спортинг»ни 2:1 ҳисобида таслим қила олди. «Бенфика» бу борада учинчиси бўлиши мумкин.
Ўзаро ўйинлар
Мазкур жамоалар фақатгина икки марта тўқнаш келган. Лиссабонда «Бенфика» 2:1 ҳисобида зафар қучган бўлса, жавоб ўйинида дортмундликларнинг қўли баланд келган — 5:0. Бунга 53 йил тўлди.
Изоҳ (0)