Баҳоси миллиард доллар: Cartier брендининг ҳамма орзу қиладиган 5 та энг қиммат тақинчоғи

Бу узуклар, маржонлар ва брошлар дунёдаги энг бой одамларнинг коллекциясида сақланади — бу буюмлар бир вақтлар уларнинг яқинлари учун совға бўлган, ҳозирда эса Cartier уйининг мулкига айланган.

Британия монархи Эдвард VII Луи-Франсуа Картьени “қиролларнинг заргари ва заргарлар қироли” деб атаган. Картье машҳур француз устаси Адольф Пикардан таълим олади — устози 1847 йилда нафақага чиққанида, унинг устахонасини сотиб олади ва ўз номи билан атайди.

Картьенинг биринчи машҳур мижози — Париж маликаси Матильда Бонапарт эди — ундан кейин маҳаллий аристократиядан катта буюртмалар кела бошлайди. Кейинчалик заргарлик уйи Луи-Франсуа ўғлининг қўлига ўтади. ХХ аср бошларида оила бизнеси кенгайишни бошлайди: Cartier Лондон ва Нью-Йоркда ҳам очилади. Шу билан бирга, Эдвард II бренддан 27 та диадема буюртма қилади. Икки йилдан сўнг, 1904 йилда бренд Британия монархлари учун заргарлик буюмларининг расмий ва асосий етказиб берувчисига айланади. Тез орада дунёдаги энг бадавлат оилалар Рокфеллерлардан тортиб Вандербилтларгача унинг мижозлари бўлади.

60 йилларга келиб, инқироз даврида бренднинг молиявий аҳволи ёмонлашади. 1964 йилда Картьенинг кенжа набираси вафотидан сўнг, Cartier инвесторлар томонидан сотиб олинади. Кейин эса барча мулк ҳуқуқи тадбиркор Иоганн Рупертга ўтказилади, бу эса қиммат брендни фуқаролар учун қулайроқ қилган ҳолда инқирозни енгиб ўтишга ёрдам берди. Унинг ташаббуси билан Cartier коллекциясида нафақат заргарлик буюмлари, балки ручкалар, зажигалкалар ва атирлар ҳам тақдим этилган.

Соатлар заргарлик уйи дастлаб ихтисослашган асосий буюмлардан бири бўлиб қолмоқда. Кейинчалик эса узуклар, билагузуклар ва маржонлар яратилган.

Sunrise Ruby узуги — 30,38 миллион доллар

Ҳеч бир ёқут бунчалик қимматга баҳоланмаган. Sunrise Ruby узуги 2025 йилда Женевада Sotheby’s аукционида 30 миллион долларга сотилган. Оғирлиги 25,59 карат бўлган, олмос билан безатилган ёқут Cartier коллекциясида энг қимматбаҳо тош ҳисобланади — у Мьянмада қазиб олинган. Харидорнинг кимлиги ошкор қилинмаган.

Hutton-Мdivani jadeit маржони — 27,4 миллион доллар

Бу маржон XVIII асрда ўз даврининг энг бой магнати Фрэнк Вулвортнинг коллекциясида эди. Аммо заргарлик буюми Вулвортнинг набираси Барбара Ҳаттонга мерос қолгандагина машҳур бўлади. Жадеитдан ясалган 27 та катта яшил мунчоқлардан иборат маржон Барбарага 1933 йилда шаҳзода Алексис Мдиванига турмушга чиқаётганида совға қилинган.

Икки йилдан сўнг эр-хотин ажрашади — шаҳзода қизга пул эвазига уйланганди, шу сабаб севги ҳақида гап бўлиши мумкин эмасди. Бироқ ажрашгандан сўнг маржон Мдиванининг ихтиёрида қолади ва деярли 50 йил давомида оила мулки сифатида сақланади. 2014 йилда Гонконгдаги Sotheby’s аукционида Hutton-Мdivani маржони Cartier заргарлик уйига 27,44 миллион долларга сотилади.

Lа Peregrina маржони — 11,8 миллион доллар

Луи-Франсуа Картье ушбу маржонни Элизабет Тейлор учун яратган. Maрваридни XVI асрда Панама қирғоқларидан африкалик қул топиб олган, бунинг учун у озодликка эришган. Қимматбаҳо тош испан қироллик оиласига берилади, у Мэри Тюдорга ёқиб қолади. Бир мунча вақт марварид монарх тожини ҳам безаган.

Peregrina 1969 йилда кимошди савдосида Ричард Бартонга 37 000 долларга сотилади, у маржонни рафиқаси Элизабет Тейлорга Севишганлар кунига совға сифатида ҳадя қилади. Maрварид шунчалик катта эдики, у безагидан тез-тез тушиб кетарди — тош Букингем саройининг полидан ёки итнинг оғзидан топиб олингандан кейин ҳам Cartier маржонига ўрнатишга қарор қилинади. Маржон 2011 йилда сотилган.

Panthere билагузуги — 7 миллион доллар

Panthere Cartier тарихидаги энг қимматбаҳо тақинчоқ ҳисобланади. Узоқ вақт давомида у Британия монархи Эдвард III нинг рафиқаси Уоллис Симпсонга тегишли эди. Жан Туссен томонидан яратилган Panthere билагузуги заргарлик уйи коллекциясидаги энг машҳур ва энг қимматларидан бирига айланади. Дизайнер пантераларни яхши кўрарди ва Луи-Франсуа Картьенинг сўзларига кўра, ўзи ҳам уларга ўхшарди.

Чўзилган поза, олмос ва ониксларнинг порлаши, зумрад кўзлар — бундай тақинчоқни фақатгина орзу қилиш мумкин эди. Билагузук фақат икки марта қўлдан қўлга ўтади. 1986 йилда Уоллис Симпсоннинг вафотидан кейин у 1 миллион долларга, 2010 йилда эса 7 млн долларга сотилган.

Belle Epoque Diamond Devant-De-Corsage броши — 17,6 миллион доллар

Ушбу ҳашаматли брош ҳақида маълумотлар кўп эмас. Фақатгина 1912 йилда Анри Пикнинг Париж устахонасида тайёрлангани маълум. Марказдаги олмос нок шаклида ва оғирлиги 34,08 карат, остидаги овал олмоснинг оғирлиги эса 23,55 карат. Ҳозирда мазкур брош шахсий коллекцияда сақланади. У узоқ вақт давомида Елизавета II да бўлган деган фикр ҳам бор — марҳум қиролича брош тақишни яхши кўрарди.