YouTube’даги Аrt of Тhe Film канали «Оскар – 2017» мукофотига номзод сифатида кўрсатилган фильмлардан олинган лавҳалардан тузилган роликлар жамланмасини тақдим этди. Бу ҳақда TJournal хабар берди.
Жамланманинг оммабоп роликида муаллифлар энг яхши визуал эффектлар учун «Оскар»га номзод сифатида кўрсатилган фильмларни тақдим этди: «Чуқур сувли горизонт», «Доктор Стрэнж», «Жунгли китоби», «Кубо: Самурай ҳақида афсона», «Биринчи қувғин. Юлдузлар жанги: Ҳикоя».
Тўпламда тасвирга олиш майдонида олинган лавҳалар ҳам намойиш этилган. Улар махсус эффектлар киритилганидан кейинги вариант билан солиштирилади.
«Энг яхши фильм» номинациясига бағишланган роликда «Ташриф», «Тўсиқлар», «Виждон амрига кўра», «Ой шуъласи», «Денгиз бўйидаги Манчестер», «Шер», «Исталган йўл билан», «Яширин шакллар» ва «Ла-Ла Ленд» фимларидан лавҳалар намойиш этилган.
Энг яхши либослар дизайни мукофотига кўрсатилган номзодлар ҳақидаги видеода «Фантастик махлуқлар», «Иттифоқчилар», «Флоренс Фостер Женкинс», «Жеки» ва «Ла-Ла Ленд» фильмлари учун яратилган кийимлар эскизлари кўрсатилган.
Энг яхши грим ва соч турмаги учун «Оскар - 2017» номзодларига бағишланган видеода «Увенинг иккинчи ҳаёти», «Қотиллар жамоаси» ва «Стартрек: Чексизлик» фильмлари ҳақида ҳикоя қилинади.
Энг яхши анимацион фильм номзодлари ҳақидаги қисқа роликда «Кубо», «Моана», «Ҳайвонлар шаҳри», «Қизил тошбақа», ва «Қовоқчанинг ҳаёти» мультфильмларининг тасвирга олиниш жараёнларидан лавҳалар кўрсатилган.
Фильм учун энг яхши мусиқа номинацияси ҳақида тайёрланган роликда «Жеки», «Йўловчилар», «Ла-Ла Ленд», «Шер» ва «Ой шуъласи» фильмлари саундтрекларидан олинган парчалар келтирилган.
Энг яхши овоз монтажи мукофоти учун номзодларга бағишланган роликда «Ташриф», «Чуқур сувли горизонт», «Виждон амрига кўра», «Салли», «Ла-Ла Ленд», «Биринчи қувғин. Юлдузлар жанги: Ҳикоя», «13 соат: Бенгазининг сирли аскарлари» фильмларидан парчалар тақдим этилган.
Энг яхши режиссёрлик учун номзодларга бағишланган видеода лавҳалар номзодларнинг изоҳлари билан бирга келади: Дени Вильнев («Ташриф»), Мел Гибсон («Виждон амрига кўра»), Демьен Шазел («Ла-Ла Ленд»), Кеннет Лонерган («Денгиз бўйидаги Манчестер») ва Барри Женкинс («Ой шуъласи»).
Энг яхши саҳналаштирувчи рассом иши номинацияси учун тайёрланган видеода «Ташриф», «Фантастик махлуқлар», «Яшасин Цезар!», «Ла-Ла Ленд» ва «Йўловчилар» фильмларидан лавҳалар тақдим этилган.
Энг яхши мослаштирилган сценарий мукофоти номзодларига бағишланган видеода («Ташриф», «Тўсиқлар» «Яширин шакллар», «Шер» ва «Ой шуъласи») ҳақиқий асарнинг ўзидан парчалар келтирилган.
Лос-Анжелесда 26 февраль куни «Оскар»нинг бўлиб ўтадиган 89-тақдирлаш маросимида Жимми Киммел бошловчилик қилади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.