31 январь куни Тошкентда «Ижтимоий инклюзия: болалар ижтимоийлашувидаги янги йўналишлар» мавзуидаги Халқаро конференция ўз ишини бошлайди. Бу ҳақда Лола Каримова-Тиллаева Facebook’даги саҳифасида маълум қилди.
Ижтимоий инклюзия — маълум бир гуруҳнинг жамиятга уйғунлашуви тушунчасини англатади. Мазкур тушунча имконияти чекланган ва ота-она қарамоғисиз қолган болаларга нисбатан уларга ўзга болалар қаторида жамият ҳаётида тўлақонли иштирок этиши учун шароит яратиб бериш ҳамда уларнинг ташқи муҳит билан уйғунлашуви ва ижтимоийлашуви жараёнида тўғаноқ бўлувчи вазиятларни олдини олиш ва ҳал этиш маъносида қўлланилади.
Халқаро конференция болалар ижтимоий инклюзияси соҳасидаги ўзбекистонлик ва чет эллик мутахассислар орасида мулоқот ва малака алмашинувига яхши имконият яратиб беради.
Конференция натижалари имконияти чекланган ва ота-она қарамоғисиз қолган болаларнинг ижтимоий интеграцияси тизимини такомиллаштиришга катта ҳисса қўшади деб умид қиламан.Конференция доирасида умумий ва секция йиғилишлари, давра суҳбатлари, постер тақдимотлар ва мастер класслар бўлиб ўтади. Уларда халқаро экспертлар томонидан педагоглар, тиббиёт ходимлари, психологлар, ҳуқуқшунослар, ижтимоий соҳа вакиллари ва ҳуқуқни ҳимоя қилиш органлари вакиллари учун хатар гуруҳидаги болалар билан ишлаш, уларни ҳимоя қилиш, ушбу болаларнинг таълим-тарбияси ва ривожланиши борасидаги замонавий методикалар хусусида сўзлаб берилади.Лола Каримова-Тиллаева, «Сен ёлғиз эмассан» Республика жамоатчилик болалар фонди ва Республика болалар ижтимоий мослашуви маркази раиси
Халқаро конференция «Сен ёлғиз эмассан» Республика жамоатчилик болалар фонди ва Республика болалар ижтимоий мослашуви маркази томонидан Ўзбекистон Республикаси Халқ таълими, Олий ва ўрта махсус таълим, Соғлиқни сақлаш, Меҳнат вазирликлари, Тошкент шаҳар ҳокимияти, шунингдек, ЮНИСЕФ ва ЮНЕСКОнинг Ўзбекистондаги ваколатхоналари, «Камолот» ЁИҲ кўмагида ташкил этилмоқда.
Конференция ишида 200 га яқин маҳаллий ва хорижий мутахассис, жумладан, Ўзбекистоннинг вазирлик ва идоралари, ЮНИСЕФ, ЮНЕСКО, БМТнинг Тараққиёт дастури каби халқаро ташкилотлар вакиллари, дипломатик корпус, шунингдек, Беларусь, Германия, Исроил, Ирландия, Испания, Италия, Россия ва Қозоғистон каби давлатлардан экспертлар иштирок этади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)