АҚШ президентлигига сайловда Демократлардан номзод сифатида иштирок этган Ҳиллари Клинтоннинг яқин дугонаси Нира Танден сиёсатчи Нью-Йорк мэрлигига номзодини кўрсатмаслигини айтди. Бу ҳақда у CNN телеканалига берган интервьюсида маълум қилди, деб хабар беради «Интерфакс».
Илгарироқ АҚШ Демократик партияси ўз вакили Билл де Блазионинг Нью-Йорк раҳбари сифатидаги ишидан жуда норозилиги маълум бўлган эди. Шу боис партия Ҳиллари Клинтонни ушбу лавозим учун курашга чақирмоқда.
2017 йили де Блазио ушбу лавозимга ўз номзодини қайта кўрсатиш учун партия праймеризларида иштирок этиши лозим бўлади. Таҳлилчиларнинг фикрича, Клинтон хоним мана шу дастлабки босқичдаёқ ундан устун келиши мумкин.
Аммо Танден хоним дугонаси бу мансаб учун рақобатда ҳеч қачон иштирок этмаслигини айтди.
«Ўйлашимча, у оилалар ва болаларга ёрдам кўрсатиш билан шуғулланади. У бу масалалар билан олдиндан шуғулланиб келган», — деди у.