Ретро услубидаги образни қандай яратиш мумкин?

Барча янгиликлар аслида унутилган эски нарсалардир. Бу фикр мода олами учун айниқса мос тушади. Унутилган тенденциялар неча марта яна такрорланганлигини эслаб кўринг. Ретро услубни айнан унинг актуаллиги, енгиллиги учун хуш кўришади. Бундай либослар доим урфда саналади.

Бироқ ретро услубни ҳис қилиш учун шуни англаш лозимки, ретро бу фақат туфли билан уйғун ўтмиш либоси эмас. Ретро услуб бу — соч турмаги, макияж, аксессуарлар, ва албатта, яхши кайфиятдир.

Джинси ёки юбка кийган ретро услубидаги хонимни тасаввур қилиш қийин. Бунда сизга кўйлак ёрдамга келади. Бундай кўйлак албатта нафис бўлиб, бел қисмига урғу бериши лозим.

Соч турмагига келсак, Бриджит Бордо ёки Одри Хепбёрннинг латофатли турмаклари кўз олдимизга келади. Ретро турмаклар бу — гажаклар, юқоридан йиғиб қўйилган сочлар ва ўримлардир. Ҳозирги кун машҳурлари орасида Дита фон Тизнинг услуби замонавий ретро-шикнинг ёрқин тимсоли бўла олади.

Бу услуб учун 60 йилларнинг кўркам макияжи мос тушади. Кўзнинг ташқи бурчагига чизилган узун чизиқлар, табиий рангли лаб бўёғи ва қалин киприклар ўша давр аёлларига хос пардоздир.

Ретро услубдаги образ яратишнинг энг оддий усулларидан бири даврга хос аксессуар қўшишдир. Биргина кўзойнак ёрдамида ташқи кўринишингизни тубдан ўзгартиришингиз мумкин. Бу Жаклин Кеннеди услубидаги катта кўзойнак бўлиши мумкин.

Ҳозирги вақтда шляпадаги аёлни учратиш мушкул. Бироқ айнан шляпа ёрдамида оммадан ажралиб, бетакрор услубни яратиш мумкин. Қолаверса, ушбу мавсумда улар ҳар қачонгидан кўра ҳам актуалроқ. Ретро услубни башанг бош кийим ёрдамида яратишдан осон иш йўқ.

Ретро сумка танлашда ё елкадаги сумка, ёки клатч билан кифояланиш керак. Аксессуар либос ва оёқ кийимга мос бўлиши ва эътиборни ўзига жалб этмаслиги зарур.

Тақинчоқлар образингизни тўлдиришга ёрдам беради. Ушбу ҳолатда марваридли тақинчоққа эътибор қаратишни тавсия этамиз. Улар кундалик образ билан бир қаторда, байрам оқшомлари учун ҳам мос тушади.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.