Футбол бўйича Ўзбекистон миллий термасининг собиқ сардори Сервер Жепаров жамоани хорижлик мутахассис бошқариши мумкинлиги борасида «Championat.asia» томонидан берилган саволга ўз муносабатини билдирди.
«Узоққа бориб ўтирмасдан Россияни мисол қилиб олайлик. Уни хорижий таниқли мутахассислар бошқарди. Лекин натижа бирданига яхши бўлиб қолмади. Фақатгина голландиялик Хиддинкнинг хизматларини эътироф этиш мумкин», — деб фикр билдирган Жепаров.
Қайд этиш керак, Россия миллий терма жамоасига илк хорижий мураббий 2006 йилда ташриф буюрган бўлиб, голландиялик Гуус Хиддинк билан россияликлар 2008 йил Европа Чемпионатининг ярим финалига қадар етиб борганди.
Хиддинкдан кейин бошқа бир голландиялик Дик Адвокат ташриф буюрди, ундан кейин эса италиялик Фабио Капелло ишлади. Бироқ улар муваффақиятга эриша олмади.
«Менинг фикримча, агар четдан мутахассис олиб келиш талаб этилса, ўз ишини жуда яхши биладиган мураббий билан ҳамкорлик қилиш керак».
Айни вақтда Ўзбекистон миллий терма жамоасини Самвел Бабаян бошқариб бормоқда. Унинг бошчилигида терма жамоа ЖЧ—2018 3-саралаш босқичида Эрон ва Жанубий Кореядан кейин 3-ўринни эгаллаб турибди.
Изоҳ (0)