Ўзбекистонлик футболчи Санжар Турсунов Қатар Юлдузлар Лигасининг «Ал-Ҳарайтият» клуби билан 1,5 йиллик шартнома тузди. Бу ҳақда «Championat.asia» нашри маълумот берди.
«Ал-Ҳарайтият» Юлдузлар Лигасидаги 14 клуб орасида 13-турдан кейин 10-ўринни эгаллаб турибди. Клуб ҳозирга қадар 12 очко жамғаришга муваффақ бўлган: 3 та ғалаба, 3 та дуранг ва 7 та мағлубият.
Маълумотга кўра, «Ал-Ҳарайтият» австралиялик легионер Эрик Парталу билан хайрлашган. Осиёлик легионер лимитини эса Санжар Турсунов билан тўлдиришга қарор қилган.
Турсунов бунга қадар ҳам Қатар Юлдузлар Лигасида тўп сурган бўлиб, айни вақт чемпионатида 7-поғонани эгаллаб турган «Умм Салал» шарафини ҳимоя қилганди.
«Ал-Ҳарайтият»га қадар Санжар Турсунов Украинанинг «Ворскла» клубида ҳаракат қилиб, мавсум давомида 11 та ўйин ўтказди ва 3 та гол урди. Голларнинг бири амалдаги чемпион, Чемпионлар Лигаси иштирокчиси бўлган Киевнинг «Динамо» клуби дарвозасига киритилган.
Санжар Турсунов ОАВда бир неча бор чиқиш қилиб, «Ворскла» клуби футболчилардан қарздор экани ҳақида айтган ва бир неча ойдан буён улар маошсиз ўйнаётганини таъкидлаганди.
Маълумот учун, Қатар Юлдузлар Лигасининг «Ал-Жаиш» клуби сафида ўзбекистонлик яна бир футболчи Сардор Рашидов ҳаракат қилади. Айни вақтда у 8 та гол билан тўпурарлар орасида бормоқда.
Изоҳ (0)