Саратонга чалинган Брэдли Лоури — «Челси» дарвозасига пенальтидан гол урган «Сандерленд»нинг 5 ёшли тимсоли

Англиянинг Хартлпул шаҳри яқинидаги Блэкхолл Коллири қишлоғида истиқомат қилувчи 5 ёшли болакай — Брэдли Лоури «Сандерленд» футбол клубига мухлислик қилади.

Англия чемпионати 16-туридаги «Челси»га қарши ўйинда Брэдли Лоури «Сандерленд»нинг тимсоли сифатида майдонга чиқиб келди.

«Челси» жамоаси аъзолари Брэдлига клуб футболкасини ҳадя қилиб, кейинроқ у билан чигалёзди машқларини ўтказди.

«Сандерленд» футболчилари эса уни ўзлари билан майдонга олиб чиқди.

Чигалёзди машқлари вақтида ёш футбол ишқибози 11 метрлик нуқтадан гол уришга ҳам муваффақ бўлди.

2013 йили 2 яшар болакайда нейробластома — асаб тизимининг зарарли ўсимтаси аниқланган эди.

Уни АҚШда даволаш учун 700 минг фунт-стерлинг маблағ йиғилди. Жумладан, бу пулнинг 200 минги «Эвертон» клуби томонидан хайрия қилинган эди.

Брэдли даволаниш курсларини ўтаганига қарамай, унинг хасталиги ортга чекинмаяпти. Ўтган ҳафта 5 ёшли болакайнинг онаси Жемма саратон ривожланишда давом этаётгани ва навбатдаги даволаш курслари Брэдлининг ҳаётини узайтиришгагина ёрдам беришини маълум қилди.

Брэдли Лоури «Сандерленд»нинг тимсоли бўлиб чиққан ўйинларнинг 5-дақиқасида бутун стадион унга қарсак чалади. Бу ҳолат «Эвертон»га қарши ўйинда ҳам кузатилган эди.

Таъкидлаш керакки, Англия футбол ҳамжамияти хаста, эътиборга муҳтож кишилар, айниқса, болаларни қўллаб-қувватлаш, уларни рағбатлантиришга қаратилган ижтимоий тадбирларни мунтазам ташкил этади, зарурат туғилганда, ёрдам маблағларини тўплайди.

• «Бу болакай бизлардан анча кучли, ҳар биримиздан яхшироқ. У ҳақиқий қаҳрамон». Оёқ ва қўлларсиз футбол ўйнайдиган 8 ёшли болакай ҳақида