15 ноябрь куни Сеулда Жанубий Кореяга қарши баҳс олиб борадиган Ўзбекистон миллий терма жамоаси 10 ноябрь куни Иорданияга қарши ўртоқлик ўйинида майдонга тушиб, 1:0 ҳисобида муваффақият қозонганди.
Учрашувнинг эртасига «Championat.asia» нашри миллий терма жамоа сардори Одил Аҳмедов, вице-сардор Сервер Жепаров, катта танаффусдан кейин термага қайтиб келган Вадим Афонин ҳамда «Бунёдкор» клуби ҳужумчиси Элдор Шомуродовдан интервью олди.
«Иорданияга қарши мазмунли ўйин кўрсатдик ва ўйлайманки, мухлислар бундан хурсанд бўлди. Бу учрашув Жанубий Кореяга қарши тайёргарлик вазифасини ўтаб берди. Насиб қилса, Сеулдан очко билан қайтамиз», — деб фикр билдирди Вадим Афонин.
«Иорданияни мағлуб этиб, Сеулга яхши кайфиятда етиб боришни ният қилгандик. Жанубий Кореяга қарши беллашувда ҳам мухлисларни хурсанд қиламиз», — деб айтиб ўтган Элдор Шомуродов.
Терма сардори Одил Аҳмедов эса Иорданияга қарши ўйинда бор кучи билан ҳаракат қилмаганини тан олди: «Иордания билан ўйинда бор кучимиз билан ўйнамадик. Бу шунчаки репетиция эди. Бор кучимизни Жанубий Кореяга олиб қўйдик».
Вице-сардор Сервер Жепаров иорданиялик футболчи билан тўқнашиб кетиб, кичик жароҳат олган: «Асосийси ғалаба қозондик ва кайфиятимиз кўтарилди. Рақиб футболчиси билан тўқнашиб кетганимдан кейинги жароҳатим жиддий ёки йўқлигини текширувдан кейин билиб оламиз. Жанубий Кореяга қарши ўйиндан фақат ғалаба кутмоқдамиз. Мен ҳам, қолганлар ҳам дуранг ҳақида ўйламаяпти. Ютиш учун майдонга чиқамиз», — деб фикрини якунлади ўз вақтида Жанубий Корея Кей лигасида тўп сурган ва мамлакат чемпиони бўлган ярим ҳимоячи.
Иорданияга қарши ўйиннинг Анзур Исмоиловга ёқмагани, Самвел Бабаяннинг кўнгли тўлгани, Игорь Сергеев эса ҳар қандай танқидга тайёрлиги борасида мана шу ҳаволада ёзилган. Жанубий Корея термаси футболчиларининг Ўзбекистон ҳақидаги фикрлари билан шу линк орқали танишиш мумкин.