Колумбия—2016. Бразилиядан кейин испан футзалчилари ҳам мундиал билан хайрлашди, Португалия ярим финалда

Колумбия мезбонлигида ўтаётган футзал бўйича Жаҳон Чемпионати Бразилия ва Испаниянинг чемпион бўлмагани билан эсда қоладиган биринчи мундиал бўлади.

Бунга қадар ўтказилган 7 та мундиалнинг 5 тасида Бразилия термасининг қўли баланд келган бўлса, қолган 2 тасида Испания бош совринга эга чиққанди.

Ҳисоб бўйича саккизинчи Жаҳон Чемпионатининг нимчорак финалида Бразилия Эрондан енгилган бўлса, Испания футзалчилари чорак финалда Россияга имкониятни бой берди — 2:6.

Турнирда ўз иштирокини давом эттираётган Осиёнинг ягона жамоаси Эрон ҳам ярим финал чиптасини қўлга киритди. Парагвайга қарши саф тортган қитъа чемпиони асосий вақтни 3:3 ҳисобида якунлади ва қўшимча дақиқада яна 1 та гол уришга муваффақ бўлди.

Чорак финалдаги энг йирик ҳисоб Аргентина ва Миср ўйинида қайд этилиб, Италияни турнирдан чиқариб юборган африкаликлар жавобсиз 5 та гол ўтказиб юборди. Португалия эса Озарбайжон устидан 3:2 ҳисобида зафар қучди.

27—28 сентябрь кунлари ярим финал беллашувлари бўлиб ўтади. Унда Эрон Россияга қарши залга чиқса, Аргентина ва Португалия термалари ўзаро ҳисоб-китоб қилади.