10 сентябрь куни Колумбияда старт оладиган футзал бўйича Жаҳон Чемпионатига тайёргарлик кўраётган Ўзбекистон футзал терма жамоаси Қозоғистонга қарши 2 та ўртоқлик ўйинида майдонга тушади.
Ўзбекистон Футзал Ассоциацияси маълумотига кўра, 9—10 август кунлари бўлиб ўтадиган беллашувларга Олмаота шаҳри мезбонлик қилади.
Ўзбекистон Жаҳон Чемпионатининг «А» гуруҳида мезбон Колумбиядан ташқари Португалия ва Панамага қарши кураш олиб боради. 2016 йилги Европа Чемпионатида Испания ва Россиядан кейин учинчи бўлган Қозоғистон эса «E» гуруҳида Аргентина, Саломон ороллари, Коста-Рика каби термалар билан тўқнаш келади.
Ўзбекистон футзал терма жамоаси 2016 йилги Осиё Чемпионатини вице-чемпион сифатида якунлаган бўлса, Қозоғистон термаси шу йил ўтказилган Европа Чемпионатида Хорватия, Италия, Сербия каби мамлакатларни мағлуб этишга муваффақ бўлган.
12—13—14 июль кунлари Тожикистон термасига қарши 3 та ўртоқлик ўйинида майдонга тушган Ўзбекистон термаси 1 та ўйинда 2:1 ҳисобида устун келган, қолган иккитасида 3:3 ва 5:5 ҳисобларида дуранг ўйнаганди.
Изоҳ (0)