Ди Каприо «Уолл Стрит бўриси» фильми ҳақидаги иш юзасидан судга чақирилди

Нью-Йорк судьяси Стивен Лок таниқли актёр Леонардо Ди Каприо кўрсатма бериш учун судга келишини тайинлади. Бу ҳақда «РБК» хабар бермоқда.

Шикоят аризасини 2014 йилда Stratton Oakmont компаниясининг собиқ менежери Эндрю Грин киритган эди. Грин «Уолл Стрит бўриси» фильмидаги Ники Коскофф образи (Пи Жей Бирн ижросида) ундан кўчирилганига амин. Гриннинг фикрича, Коскоффнинг гиёҳванд моддалар истеъмол қилиши ва фоҳишалар билан мулоқот қилиши билан боғлиқ саҳналар туҳматдир. Шу боис у киночилардан 50 миллион доллар талаб қилмоқда.

Ди Каприонинг адвокатлари актёр сценарий муаллифи бўлмагани боис кўрсатма бериши шарт эмаслигини уқтириб келаётган эди. Аммо Гриннинг адвокатлари у режиссёр Мартин Скорсезе ва сценарийнавис Теренс Уинтер билан сценарийни муҳокама қилганини исботлаб берди.

Paramount компанияси Коскофф образининг реал прототипи йўқлигини таъкидлаб келмоқда.