Франция мезбонлик қилаётган Евро—2016 нинг «B» гуруҳида 2-тур беллашувларига якун ясалди.
16 июнь санасидаги биринчи беллашувда Англия ва Уэльс терма жамоалари ўзаро саф тортди. 2-турнинг «B» гуруҳидаги биринчи ўйинида Словакия термаси Россияни 2:1 ҳисобида мағлуб этганди.
Англияга қарши беллашувнинг 42-дақиқасида Гарет Бэйл жарима зарбасини аниқ амалга ошириб, уэльслик футболчиларни ҳисобда олдинга олиб чиқди. Қайд этиш керак, Словакияга қарши ўйинда ҳам «Реал» клуби аъзоси жарима зарбасидан гол уришга муваффақ бўлганди.
Иккинчи бўлимни Англия миллий терма жамоаси бош мураббийи Рой Хожсон 2 та ўзгариш билан бошлади. Бошланғич таркибда кўриниш берган Раҳим Стерлинг ҳамда Ҳарри Кейн каби футболчилар ўрнига Жейми Варди ва Дэниел Старриж кабилар туширилди.
56-дақиқада «Лестер» билан Англия чемпионлигини қўлга киритган Жейми Варди ҳисобни тенглаштиришга муваффақ бўлди. Маълумот учун, Варди Европа Чемпионатлари доирасидаги ўзининг дебют учрашувида майдонга тушганди.
92-дақиқага келиб «Ливерпуль» клуби аъзоси Дэниел Старриж ўз номини таблога ёзиб, Англия термасига муҳим бўлган 3 очкони тақдим этди — 2:1.
2-турдан кейин Англия 4 очко билан «B» гуруҳи етакчисига айланиб олди. Уэльс ва Словакия ҳисобида 3 тадан очко бор. 1 очкога эга Россия гуруҳнинг сўнгги ўриндаги вакили бўлиб турибди.
«B» гуруҳидаги 3-тур ўйинлари 20 июнь куни бўлиб ўтади. Унда Россия ва Уэльс майдонга тушса, параллел ўйинда Англия ҳамда Словакия термалари ўзаро ҳисоб-китоб қилади.
[wpse_match id="351439" show_title=1]
Изоҳ (0)