BuzzFeed медиа тармоқ ресурси АҚШ Республикачилар партиясининг Миллий қўмитаси билан 1,3 миллион долларга тенг реклама шартномасини бекор қилди. Бу ҳақда 6 июнь, душанба куни BuzzFeed раҳбари Жона Перетти маълум қилди, дея хабар бермоқда «ТАСС».
Бунга мазкур партиянинг АҚШ президентлик лавозимига расман номзоди Дональд Трампнинг тажовузкор нутқидан қатъий норозилик сабаб бўлди.
«Бугун биз партия қўмитасига Трампнинг реклама ролигини жойлаштирмаслигимиз ва шартноманинг амал қилишини тўхтатишимизни маълум қилдик», — деб таъкидлади у. «Трампнинг сайловолди кампанияси АҚШдаги ва бутун дунёдаги ходимларимизнинг эркинлигига қарши қаратилган. Унинг мусулмонларнинг АҚШга киришини тақиқлаш ҳақидаги таклифи (агар бу ҳаётга татбиқ этилса) ходимларимизга ўз вазифаларини бажаришига тўсқинлик қилади», — деб тушунтирди Перетти.
«Баъзан истисно тариқасида ишимизни молиялаштирувчи даромаддан воз кечишга тўғри келади. Биз соғлиғимиз учун хавфли бўлганлигидан тамаки рекламасини жойлаштирмаймиз. Трампнинг реклама ролигини ҳам айнан шу сабабга кўра жойлаштирмаймиз», — деб қўшимча қилди медиа ресурс раҳбари.
Изоҳ (0)