Европа Чемпионлар Лигасининг финалига йўлланма олган Мадриднинг «Реал» футбол клуби бош мураббийи Зинедин Зидан «Манчестер Сити»га қарши жавоб ўйинидан кейин байрам қилмоқчи эканини маълум қилди, деб ёзди «Чемпионат».
«Финал биз учун қийин бўлади. Лекин ҳозир байрам қиламиз», — деб фикр билдирди «Реал» бош мураббийи ярим финал ўйинидан кейин ташкил этилган матбуот анжуманида.
«Бугун бизга осон бўлмади ва биз бунга тайёр эдик. Охир-оқибат мақсадимизга етганимиздан шодман. Футболчилар финалга чиқиш учун ҳақли эдилар. Бутун ўйин давомида мухлислар биз билан бўлишди, бу эса ҳар доим ёрдам беради».
Зинедин Зидан жароҳатини даволаб, «Манчестер Сити»га қарши учрашувда сафга қайтган шогирди Криштиану Роналдунинг ўйини борасида ҳам тўхталиб ўтди: — «Криштиану ҳар доимгидек ўйин кўрсатди. Бугун ҳамма бирдек меҳнат қилгани учун ҳам финалга йўл олдик. Мен бугун ҳаммасидан қониқиш ҳосил қилдим».
Европа Чемпионлар Лигасининг финал ўйини 28 май куни Милан шаҳрида бўлиб ўтади ва унда Мадриднинг икки клуби — «Реал» ҳамда «Атлетико» бош соврин учун кураш олиб боради.
Изоҳ (0)