Yevropa Chempionlar Ligasining final chiptasini qo‘lga kirita olmagan “Manchester Siti” futbol klubi bosh murabbiyi Manuel Pellegrini “Real”ga qarshi o‘yindan keyin o‘z fikrini bildirib, natijadan hafsalasi pir bo‘lganini ma’lum qildi. Bu haqda “Chempionat” xabar berdi.
“Natijadan hafsalam juda pir bo‘ldi. Xavfli hujumlarga boy bo‘lmagan o‘yinda har ikki klub teng futbol ko‘rsatgandi”, — deb aytib o‘tdi Manuel Pellegrini.“Manchester Siti” ustozi klub sardori Vensan Kompanining 10-daqiqadayoq jarohat olib, maydonni tark etishi natijaga o‘z ta’sirini ko‘rsatmaganini qo‘shimcha qildi: — “O‘yin davomida markaziy himoyachini almashtirishga majbur bo‘lish yaxshi emas, albatta. Lekin bu holat natijaga ta’sir ko‘rsatdi, deb o‘ylamayman. Bizda muammo himoya chizig‘ida emas, xuddi “Real”dagi kabi hujum chizig‘ida kuzatildi va gol urish uchun yetarlicha imkoniyatga ega bo‘lmadik”, — deb fikr bildirdi mutaxassis.
Ma’lumot uchun, “Manchester Siti” 2015/16-yilgi mavsum hisobidan 4 ta turnirda ishtirok etib, faqatgina Angliya Liga Kubogida bosh sovringa ega chiqdi.