АҚШда 1988 йилдан буён ОИВ аниқланган донорлар аъзоларини кўчириб ўтказишга тақиқ амал қилиб келган ва 2013 йилнинг ноябрида Барак Обама томонидан бекор қилинган эди. Шифокор Дорри Сегевнинг баҳо беришича, ҳар йили Америкада ОИВ аниқланган донорларнинг 500—600 га яқин аъзоси бекор кетади. Бу ҳақда The New York Times маълумотига таяниб, Meduza хабар беради.
Шифокорнинг сўзларига қараганда, уларнинг аъзоларини кўчириб ўтказиш ёрдамида йилига мингга яқин ҳаётни қутқариб қолиш мумкин.
Бироқ яқин вақтга қадар ОИВ билан касалланган беморларнинг аъзоларини кўчириб ўтказиш маъносиз бўлиб ҳисобланган. «Ушбу аъзолар узоқ вақт хизмат қилмаслиги барчага маълум эди», — дейди шифокор Кларксен. Бироқ ушбу хасталикка чалинган одамларнинг яшаш муддати узайгандан сўнг, уларнинг аъзоларини кўчириб ўтказиш мумкин, деган фикр пайдо бўлган.
Жорий йилнинг январь ойида Аъзоларни алмашиш ягона тармоғи (United Network for Organ Sharing) томонидан ушбу фикр ижобий баҳолангандан сўнг, Жонс Хопкинснинг шифохонаси бу йўналишдаги биринчи жарроҳликка тайёргарлик кўрмоқда.