АҚШнинг Коннектикут штатидаги Саффилд шаҳар полицияси Чаклс VIII лақабли суғурни ёлғон башорати учун «ҳибсга олди». Бу ҳақда NBC Connecticut хабар қилмоқда.
Суғур баҳор фаслининг эрта келишини башорат қилгандан кейин бир неча кун ўтгач, Коннектикут штатини қорли бўрон босиб қолди.
Ижтимоий тармоқларнинг бирида полиция томонидан жойлаштирилган ҳажвий постда, суғур олти ҳафтагача бўлган муддатга ҳибсга олиниши мумкинлиги таъкидланди. Суғур 6 февраль куни «қўлга олинган».
Суғур 2 февраль куни нишонланган Суғур куни байрамида ёлғон гапирганликда айбланмоқда.
Шунингдек, Саффилд шаҳар полицияси Lutz Children’s Museum номли музей фойдасига маблағ тўплаш ташаббуси билан чиқди. Бундан мақсад, «ҳибсга олинган» суғурни 10 минг доллар гаров пули эвазига озодликка қўйиб юбориш эканлиги таъкидланмоқда.
Эслатиб ўтамиз, АҚШнинг Пенсильвания штати, Панксатони шаҳридаги Фил лақабли суғур ҳам бу йил баҳор фаслининг эрта келишини башорат қилган эди.