Одамларни ўз стартапингизда ишлашга қандай кўндириш мумкин?

Стартапни эндигина ишга туширганингизда жамоангизга ажойиб аъзоларни йиғиш — энг қийини. Уларни ҳамма нарсани ташлаб, компаниянгизга ишга киришга қандай кўндириш мумкин?

Агар сараланган номзодларга қуйида санаб ўтилган афзалликларни тақдим этишга тайёрлигингизни кўрсата билсангиз, жамоа йиғиш имкониятингиз ошади.

1. Улар ишона оладиган ғояни таклиф қилинг

Одамлар бизнесингиз қай тарзда ва нима учун дунёни бироз бўлса-да, яхшироқ қила олишини тушуниши — муҳим. Номзоддан у нима учун сизнинг стартапингизда ишлашга қизиқаётгани ҳақида сўранг. Компаниянгиз миссияси альтруистик мақсадларга алоқадор бўлмаса-да, одамларни маҳсулот ёки хизмат яратишга илҳомлантириш учун вақт ажратинг.

2. Компанияга сезиларли фойдани келтириш имконияти

Йирик компанияда ишлаб, барқарорлик, яхши маош ва имтиёзларга эга бўлиш мумкин. Шу билан бирга, карьера зинасидан кўтарилиш, охири йўқ планёркаларга бориш ва тор мутахассислик бўйича мажбуриятларни бажаришга тўғри келади.

Стартапда эса жамоанинг ҳар бири аъзосига турли топшириқлар берилади ва улар бизнеснинг ҳар хил томонлари устида ишлайди. Кўплар шундай турдаги мажбуриятлар ва ишдаги хилма-хиллик ҳақида орзу қилади.

3. Сизнинг мўъжизавий жамоангиз

Одамлар офисда деярли бутун кунни ўтказади. Шу туфайли потенциал ходимларга улар ақлли ва қизиқарли одамлар билан ишлашини билдириш муҳимдир. Албатта, ажойиб жамоа ҳар қандай турдаги компанияда топилиши мумкин, бироқ суҳбат чоғида яхши таассурот қолдира олиш стартапда осонроқ.

4. Кўп пул ишлаб топиш имконияти

Стартапда ходимларда ҳар доим ҳам катта маош таклиф қилинмайди, бироқ компаниянинг улуши таклиф қилиниши мумкин (муайян ҳажмдаги даромадларга эришилганидан сўнг). Шунинг учун таклиф билдираётганингизда ходим учун маош ва опцион мутаносиблигини кўриб чиқинг. Номзодлар истиқболсиз таклиф ва меҳнатнинг рақобатли шароитлари ўртасидаги фарқни ажрата олади.

Потенциал ходимларни жамоа билан танишиш учун офисга олиб келганингизда, ҳар иккингиз ҳам танловни амалга ошираётганингизни ёдда тутинг. Бирингиз — ходим ёллаш учун, бошқангиз — лойиҳанинг бир қисмига айланиш учун. Одамни нима рағбатлантиришини билиб олинг, миссиянгиз ва қарашларингизни аниқ-равшан етказинг. Агар сиз барчасини тўғри бажарсангиз, керакли одамлар мамнуният билан компаниянгизга ишлашга келади.

Мақолани тайёрлашда қуйидаги манбадан фойдаланилди: Rusbase.com

Лойиҳа «Дарё» ва StartupFactory.uz томонидан ишга туширилган.