Flying Frenchies акробатик гуруҳнинг асосчиси, машҳур франциялик дорбоз Танкред Меле 30 метр баландликдан тушиб кетиши оқибатида ҳалок бўлди. Бу ҳақда Flying Frenchies Facebook’даги саҳифасида берган маълумотларга асосан «ТАСС» хабар қилмоқда.
32 ёшли Меле Франциянинг жануби-шарқидаги Дром департаментида ҳавога кўтарилган иккита ҳаво шари ўртасида тортилган арқондан ўтиш машқини бажаришга тайёргарлик кўраётганда ҳалок бўлди.
Маълум қилинишича, дорбоз ўзининг касбдошлари билан аэростатни учиришга тайёрлаб турган вақтда, ҳаво шари юқорига кўтарила бошлаган ва дорбоз шарнинг саватчасига қўллари билан осилиб қолган. Лекин, 30 метрга яқин бўлган баландликда Меле пастга тушиб кетди.
Flying Frenchies’нинг таъкидлашича, экстремал спортда Меле кўпчиликка ўрнак бўлган. У бейсжампинг, хайлайн (юқори баландликда тортилган арқондан юриш), вингсьют (қанотли костюмда парашютдан сакраш) ва бошка экстремал спорт турларида энг яхши спортчилардан бири ҳисобланган.
Спорт билан шуғулланишдан олдин Меле тўрт йил инженер бўлиб ишлаган. Унинг бир нафар қизчаси ёлғиз қолди.
Изоҳ (0)