Fransiyalik dorboz 30 metr balandlikdan tushib ketib, halok bo‘ldi

Flying Frenchies akrobatik guruhning asoschisi, mashhur fransiyalik dorboz Tankred Mele 30 metr balandlikdan tushib ketishi oqibatida halok bo‘ldi. Bu haqda Flying Frenchies Facebook’dagi sahifasida bergan ma’lumotlarga asosan “TASS” xabar qilmoqda.

32 yoshli Mele Fransiyaning janubi-sharqidagi Drom departamentida havoga ko‘tarilgan ikkita havo shari o‘rtasida tortilgan arqondan o‘tish mashqini bajarishga tayyorgarlik ko‘rayotganda halok bo‘ldi.

Ma’lum qilinishicha, dorboz o‘zining kasbdoshlari bilan aerostatni uchirishga tayyorlab turgan vaqtda, havo shari yuqoriga ko‘tarila boshlagan va dorboz sharning savatchasiga qo‘llari bilan osilib qolgan. Lekin, 30 metrga yaqin bo‘lgan balandlikda Mele pastga tushib ketdi.

Flying Frenchies’ning ta’kidlashicha, ekstremal sportda Mele ko‘pchilikka o‘rnak bo‘lgan. U beysjamping, xaylayn (yuqori balandlikda tortilgan arqondan yurish), vingsyut (qanotli kostyumda parashyutdan sakrash) va boshka ekstremal sport turlarida eng yaxshi sportchilardan biri hisoblangan.

Sport bilan shug‘ullanishdan oldin Mele to‘rt yil injener bo‘lib ishlagan. Uning bir nafar qizchasi yolg‘iz qoldi.