Бир MVP (минимал ишчи маҳсулот) ҳикояси

Ўтган мақолада минимал яшовчан маҳсулот нима эканлиги ҳақидаги назарияни гапириб бергандик. Энди эса россиялик инвестор Аркадий Морейниснинг MVP моҳиятини содда қилиб тушунтириб берувчи ҳикоясини келтириб ўтамиз.

«АҚШлик икки йигит одамларга бир ҳафталик рецептлар тўпламини ушбу рецептларга мувофиқ йиғилган ва ўралган озиқ-овқатларни сотишни бошламоқчи бўлди.

Стандарт стартапчи нима қилади? У, биринчи навбатда, рецептлар базасига эга, чиройли ва қулай интерфейсли ҳамда тезда кенгайтиришга тайёр дастурий архитектурали  сайт яратишга киришади, бу умуман олганда, бир кунлик иш эмас. Сайт тайёр бўлиб, барча асосчилар, уларнинг дўст ва танишлари ‘текшируви’дан ўтгач ва ‘чиройли-чиройли эмас’лиги бўйича баҳолангач, бундай ажойиб сайт учун рекламага пул қидириш учун инвесторларга йўл олади.

Бироқ бу икки йигит нима қилди? Улар биринчи куниёқ  энг яқин супермаркетда ‘соқчилик’ка турди ва ён-атрофдан ўтиб кетаётган аёлларга ўз хизматини таклиф эта бошлади: ‘Келинг, биз сизга ҳар ҳафта рецептлар рўйхатини тузиб, озиқ-овқатларни сотиб оламиз ва уларни кесиб, қадоқлаб қўямиз. Ҳар ҳафта сизга рўйхат ва озиқ-овқатларни келтириб берамиз, сиз эса бизга мана шунча пул берасиз’.

Улар биринчи мижозни топди, рецептлар тузиб, у учун маҳсулотлар харид қилиб, уларни тўғрай бошлади. Аёлга ҳар ҳафта озиқ-овқатларни олиб бориб бериб, ундан фикр ва баҳолар олар эди. Ўзлари учун хулосалар чиқариб, яна супермаркетга — навбатдаги мижозни топишга чиқарди.

Мижозлар сони ҳамда сотиб олиш ва тўғраш керак бўлган маҳсулотлар миқдорини бажара олмай қолгунича, йигитлар шу тарзда давом этди. Шундан сўнггина улар сайт яратиб, жараённи автоматлаштиришга киришди.

Мана шу йўл билан асосчилар, амалий маҳсулотга эга бўлмасдан туриб ҳам, базавий нарсаларни — одамлар улар таклиф қилаётган нарсага эҳтиёж сезадими, улар бунинг учун пул тўлашга тайёрми, йўқми — текшириб кўрди.»

Бу MVP нима эканлигини, бирданига жуда кўплаб функцияларга эга мураккаб маҳсулотни яратиш керак эмаслиги, балки оддийроқ нарсадан бошлаш кераклигини тушуниш учун жуда яхши мисол.

Лойиҳа «Дарё» ва StartupFactory.uz томонидан ишга туширилган.