Сузиш бўйича паралимпиячилар ўртасидаги ЖЧда ўзбекистонликлар Осиё рекордини янгилади
Буюк Британиянинг Глазго шаҳрида сузиш бўйича ўтказилаётган паралимпиячилар ўртасидаги жаҳон чемпионатида ўзбекистонлик Дмитрий Хорлин бронза медални қўлга киритди, деб хабар қилади ЎзА.
Глазго шаҳрида Халқаро паралимпия қўмитаси ва Халқаро сузиш федерацияси томонидан ташкил этилган мусобақанинг 400 метрга эркин усулда сузиш баҳсларида қатнашган тажрибали Дмитрий Хорлин 4:09,36 натижа қайд этиб, учинчи ўринни эгаллади. Унинг кўрсатган натижаси Осиёнинг янги рекорди сифатида эътироф этилди.
2012 йилги Паралимпия ўйинлари иштирокчиси Кирилл Панков ҳам эркин ва чалқанча усулда сузиш баҳсларида Осиё рекордларини янгилади.
Ҳар икки тажрибали ўзбек спортчиси сўнгги йилларда халқаро миқёсдаги нуфузли мусобақаларда юқори натижага эришиб келаётир. Айниқса, 2014 йили Жанубий Кореянинг Инчеон шаҳри мезбонлик қилган II Параосиё ўйинларида Кирилл Панков бир йўла тўртта, Дмитрий Хорлин учта олтин медални қўлга киритган. Эътиборлиси, Дмитрий ҳар уч йўналишда, Кирилл 50 метр масофага эркин сузишда Осиё рекордини ўрнатган.
