Buyuk Britaniyaning Glazgo shahrida suzish bo‘yicha o‘tkazilayotgan paralimpiyachilar o‘rtasidagi jahon chempionatida o‘zbekistonlik Dmitriy Xorlin bronza medalni qo‘lga kiritdi, deb xabar qiladi O‘zA.
Glazgo shahrida Xalqaro paralimpiya qo‘mitasi va Xalqaro suzish federatsiyasi tomonidan tashkil etilgan musobaqaning 400 metrga erkin usulda suzish bahslarida qatnashgan tajribali Dmitriy Xorlin 4:09,36 natija qayd etib, uchinchi o‘rinni egalladi. Uning ko‘rsatgan natijasi Osiyoning yangi rekordi sifatida e’tirof etildi.
2012-yilgi Paralimpiya o‘yinlari ishtirokchisi Kirill Pankov ham erkin va chalqancha usulda suzish bahslarida Osiyo rekordlarini yangiladi.
Har ikki tajribali o‘zbek sportchisi so‘nggi yillarda xalqaro miqyosdagi nufuzli musobaqalarda yuqori natijaga erishib kelayotir. Ayniqsa, 2014-yili Janubiy Koreyaning Incheon shahri mezbonlik qilgan II Paraosiyo o‘yinlarida Kirill Pankov bir yo‘la to‘rtta, Dmitriy Xorlin uchta oltin medalni qo‘lga kiritgan. E’tiborlisi, Dmitriy har uch yo‘nalishda, Kirill 50 metr masofaga erkin suzishda Osiyo rekordini o‘rnatgan.
Izoh (0)