Челябинск шаҳридаги Калинин туман прокуратураси бир неча дақиқалар ичида кўз ёриши керак бўлган аёлни туғуруқхонага қўймаслик ҳолати бўйича текширишни якунлади. Бу ҳақда «РИА Новости» хабар беради.
Назорат қилувчи орган шаҳар маъмуриятининг соғлиқни сақлаш бошқармасига қонун бузилишини бартараф этиш ва айбдорларни жазолаш ҳақидаги талаб билан тақдимнома киритади.
Маълум бўлишича, Челябинскдаги 5-сонли касалхона қўриқчилари аёлни «Тез ёрдам» эмас, унинг эри шахсий машинада олиб келганлиги учун туғуруқхонага киритмаган. Натижада эркакнинг ўзи машинада хотинига кўз ёришида ёрдамлашган. Туғруқ муваффақиятли кечган, қиз бола дунёга келган. Кейинроқ касалхона она-болани қабул қилган.