Тошкентда 4 май куни Ўзбекистон фтизиатрлари ва пульмонологларининг VIII съезди ўз ишини бошлади, деб хабар бермоқда Ўзбекистон Миллий ахборот агентлиги.
Анжуман Ўзбекистон Республикаси Соғлиқни сақлаш вазирлиги, Республика ихтисослаштирилган фтизиатрия ва пульмонология илмий-амалий тиббиёт маркази, Ўзбекистон фтизиатрлари ва пульмонологлари илмий-тиббиёт жамияти ҳамкорлигида ташкил этилди. Унда Бирлашган Миллатлар Ташкилоти, Жаҳон соғлиқни сақлаш ташкилоти вакиллари, Жанубий Корея, Хитой, Ҳиндистон, Буюк Британия, Германия, Дания, Италия, Нидерландия, Франция, Чехия каби йигирмага яқин мамлакатдан беш юздан зиёд олим, шифокор ҳамда ёш тадқиқотчилар иштирок этмоқда.
Республика ихтисослаштирилган фтизиатрия ва пульмонология илмий-амалий тиббиёт маркази директори Мирзағолиб Тиллашайхов, Бирлашган Миллатлар Ташкилоти Бош котибининг махсус элчиси Мишель Казачкин, Москва пульмонология илмий-тадқиқот институти директори, Россия тиббиёт фанлари академияси академиги Александр Чучалин ва бошқалар Президент Ислом Каримов раҳнамолигида Ўзбекистон соғлиқни сақлаш тизимида яратилган замонавий шарт-шароитлар аҳоли саломатлигини мустаҳкамлаш, соғлом ва узоқ умр кечиришини таъминлашда муҳим омил бўлаётганини таъкидлади.
Ўзбекистон Республикаси Вазирлар Маҳкамасининг 2011 йил 5 мартда қабул қилинган «2011-2015 йилларда Ўзбекистон Республикасида сил касаллиги билан касалланишни камайтиришга доир қўшимча чора-тадбирлар тўғрисида»ги қарори доирасида бу соҳадаги тиббиёт муассасаларининг моддий-техник базаси мустаҳкамланмоқда. Жаҳон тиббиётининг илғор усуллари ва воситаларидан самарали фойдаланилмоқда. Натижада мамлакатимизда силни даволаш самарадорлиги 87 фоизга етган. Жаҳон миқёсида ушбу кўрсаткич 85 фоизни ташкил этади.
Республика ихтисослаштирилган фтизиатрия ва пульмонология илмий-амалий тиббиёт маркази мамлакатимизда фтизиатрия хизматини такомиллаштириш, хусусан, сил ва сурункали носпецифик ўпка касалликларига қарши курашиш, мазкур хасталикларни энг замонавий муолажалар асосида самарали даволашга йўналтирилган етакчи илмий муассасадир. Марказнинг референс лабораторияси сифат кўрсаткичлари учун халқаро сертификат билан тақдирланган жаҳондаги энг яхши ўнта лабораториядан бири эканини алоҳида таъкидлаш жоиз. Ҳудудлардаги шифохоналар ҳам касалликни аниқлаш ва ташхис қўйиш бўйича замонавий аппаратлар билан таъминланган. У ерларда касаллик профилактикаси, диагностикаси ва даволаш ишлари кучайтирилган.
Бу жараёнда жаҳон тиббиётининг илғор услулларидан самарали фойдаланилмоқда. Хусусан, тиббий текширувларнинг бактериологик асосда ташкил этилаётгани хасталикни эрта аниқлаш, халқаро стандартлар асосида даволаш имконини бермоқда. Бу тизим хасталик даволаниши ва дорилар таъсир кўрсаткичини мунтазам ўрганиб ва баҳолаб боради. Тиббиёт марказининг ёш ва иқтидорли мутахассислари силга қарши курашнинг илғор усуллари ва жарроҳлик амалиёти бўйича АҚШ, Буюк Британия, Германия, Жанубий Корея, Малайзия, Нидерландия, Россия сингари мамлакатларнинг нуфузли клиникаларидаги ҳамкасблари билан мунтазам тажриба алмашиб келмоқда.
– Ташкилотимиз Ўзбекистон билан бир неча йилдан буён ҳамкорлик қилиб келади, – дейди «Чегарасиз шифокорлар» халқаро нодавлат тиббий-гуманитар ташкилотнинг сил бўйича лойиҳа раҳбари Берн Tomas Нянгва (Буюк Британия). – Мамлакатингизда сил хасталигининг олдини олиш, ташхис қўйиш ва жаҳон андозалари даражасида даволашга эришилмоқда. Ушбу анжуманда Ўзбекистонда соғлиқни сақлаш, хусусан, фтизиатрия ва пульмонология соҳасида олиб борилаётган ишлар ўрганилади.
Анжуман қатнашчилари сил касаллиги профилактикаси, диагностикаси ва даволаш ишларини янада такомиллаштириш, аҳолининг тиббий маданиятини юксалтириш касалликка қарши кураш жараёнидаги устувор вазифа эканини таъкидлади. Келгусида аҳолини юқумли касалликлардан муҳофаза қилишнинг профилактик тадбирларини янада кучайтириш, онкологик ҳамда сил касалликлари шифохоналари моддий-техник базасини мустаҳкамлаш кўзда тутилаётгани қайд этилди.
– Ўзбекистонда соғлиқни сақлаш соҳасига устувор аҳамият қаратилаётгани ўз самараларини бермоқда, – дейди «Салт Медис» компаниясининг бош директори Санг Ок Ли (Корея Республикаси). – Мазкур анжуман Ўзбекистоннинг бу борадаги тажрибаси билан яқиндан танишиш, турли мамлакатлардан келган мутахассислар билан фтизиатрия ва пульмонология соҳасида фикр алмашиш имконини бераётгани билан аҳамиятлидир. Анжуман доирасида Ўзбекистонда аҳоли саломатлигини муҳофаза қилиш ва мустаҳкамлаш борасида ғоят салмоқли ишлар амалга оширилаётганига амин бўлдик. Мамлакатингизда аҳолининг барча қатламига юқори малакали тиббий хизмат кўрсатиш кўлами тобора кенгайиб бораётгани эътиборга молик. Ўзбекистоннинг бу йўналишдаги ютуқларини чуқур ўрганиш ва қўллаш юксак самаралар беради.
Съезд доирасида мустақиллик йилларида Ўзбекистонда соғлиқни сақлаш, жумладан, фтизиатрия ва пульмонология соҳасида эришилган ютуқларга бағишлаб ташкил этилган кўргазма, шунингдек, мамлакатимизда фтизиатрия ва пульмонология соҳасида яратилган тизим ютуқлари акс этган ҳужжатли фильм намойиши тадбир иштирокчиларида катта таассурот қолдирди.
– Ўзбекистонда фтизиатрия ва пульмонология соҳасида амалиётга татбиқ этилаётган замонавий усуллар, қўлланилаётган янгича ёндашувлар улкан натижалар бермоқда, – дейди «Medecins Sans Frontieres» ташкилотининг минтақавий тиббий мувофиқлаштирувчиси Калян Кришна (Ҳиндистон). – Бундай самарали ислоҳотлар дунёнинг кўплаб давлатлари учун намуна бўлиб хизмат қилиши мумкин. Мазкур анжуман бу борадаги алоқалар кўламини янада кенгайтириш, ўзаро фикр алмашиш ва илғор тажрибаларни оммалаштиришда муҳим аҳамият касб этади.
Тадбирнинг биринчи кунида сил касаллигига ташхис қўйиш ва даволашнинг замонавий хусусиятлари, янги дори воситалари, суяк-бўғим силини комплекс даволашда жарроҳлик усуллари, ўпка силининг нур диагностикаси, сурункали ўпка обструктив касаллиги ва юрак-томир патологияси, ушбу касалликни даволашда тизимли энзимотерапия, болаларда сил диагностикаси ва даволашнинг халқаро стандартлари, бирламчи даволаш муассасаларида респиратор патологиясини диагностика қилиш, силнинг микробиологик диагностикаси, фтизиатрлар практикасига янги норматив ҳужжатларни татбиқ этишга оид маърузалар тингланди, фикр алмашилди.
Уч кун давом этадиган съезд доирасида давра суҳбатлари, танлов ва маҳорат дарслари ўтказилади. Ўзбекистонда силга қарши курашиш миллий дастурининг амалга оширилиши бўйича фтизиатрияда эришилган ютуқлар, хорижий мамлакатларда бу борада амалга оширилаётган ишлар, сил ва ўпка касалликлари билан кураш стратегиясида устувор йўналишлар, болаларда сил ва носпецифик ўпка касалликлари, янги дорилар, нафас органлари касалликларида тиббий реабилитация, астма эволуцияси, торакал жарроҳликнинг замонавий йўналишлари, фтизиатрия ва пульмонологияда ўқув дастурларига оид масалалар атрофлича муҳокама этилади.
Съезднинг очилиш маросимида Ўзбекистон Республикаси Бош вазирининг ўринбосари А.Икромов сўзга чиқди.
Изоҳ (0)