2015 йил 10 февраль куни Ўзбекистон Миллий кутубхонасида ўзбек мумтоз адабиётининг йирик вакили, шоир, тарихчи, давлат арбоби, моҳир саркарда Заҳириддин Муҳаммад Бобур таваллудининг 532 йиллиги муносабати билан «Анда жоним қолди...» деб номланган давра суҳбати ва китоб расмли кўргазма бўлиб ўтди. Бу ҳақда кутубхона расмий сайти хабар берди.
Ўзбекистон Ёзувчилар уюшмаси аъзоси, шоир Шукур Қурбон Бобур ҳаёти ва ижодий фаолияти ҳақида гапириб, унинг ижодидан ғазал ва рубоийлар ўқиди.
Тадбирда ЎзМТДП Марказий Кенгаши раиси ўринбосари А.Ҳ. Эшмуродов, олим, ф-м.ф.д. проф. Абдулла Аъзам, Олий Мажлис Қонунчилик палатаси депутати, тарих фанлар доктори Азамат Зиё, Халқаро Амир Темур жамғармаси раиси ўринбосари, Ўзбекистонда хизмат кўрсатган маданият ходими Тўлқин Ҳайит, ф.ф.д. адабиёцҳунос-олим Ҳамидулла Болтабоев, ҳофиз Тоиржон Латипов ва Ўзбек Миллий академик драма театри актёрлари иштирок этдилар.
Давра суҳбатида Қибрай Агротижорат касб-ҳунар ва Шайхонтоҳур Ўқув-даволаш коллежлари ўқувчилари ва Ўзбекистон Республикаси Мудофаа вазирлигининг шахсий таркиб билан ишлаш бошқармаси курсантлари ва кутубхона фойдаланувчилари ҳам иштирок этдилар.
«Бобур ҳақида гапирар эканмиз, албатта у ўз устози деб билган Алишер Навоий номини тилга олмасликнинг иложи йўқ, − деди олим, ф-м.ф.д. проф. Абдулла Аъзам, − ахир уни ҳозирги кунда ҳам ўзбек халқининг маънавий устози, деб аташимиз бежиз эмас». Нотиқ Алишер Навоийнинг «Хазоинул маоний» асаридан тарбиявий характердаги мисралардан мисол келтирди ва худди шу жиҳат Бобур лирикасига ҳам хослигини таъкидлаб ўтди.
Давра суҳбатида ўзбек давлатчилиги тарихида Бобурийлар сулоласининг ўрни ва бугунги ёшлар маънавиятидаги аҳамияти, Бобур адабий мероси, сулоланинг 33 вакили жаҳон адабиёти ва санъатига қўшган ҳиссаси алоҳида тилга олинди.
Халқаро Амир Темур жамғармаси раиси ўринбосари, Ўзбекистонда хизмат кўрсатган маданият ходими Тўлқин Ҳайит йиғилганларга Бобур номидаги халқаро жамоат фонди фаолияти ҳақида маълумот берди. Жамғарма кўмагида чоп этилган «Заҳириддин Муҳаммад Бобур энциклопедияси» китобини тақдим этар экан у китобнинг тузилишини шарҳлади ва Бобур феноменини ўрганувчилар учун китобнинг амалий аҳамиятини гапириб ўтди.
Тадбир доирасида Ўзбек Миллий академик драма театри актёри Ҳамидулла Тошпўлатов Бобур ҳаётига бағишланган саҳна кўринишларидан парчалар намойиш этди, ҳофиз Тоиржон Латипов ижросида эса Бобур ғазалларга басталанган мумтоз куйлар янгради.
Давра суҳбати Заҳириддин Муҳаммад Бобур ҳаёти ва ижодига бағишланган долзарб ва мазмунли чиқишлар билан тингловчиларда катта таассурот қолдирди.
Изоҳ (0)