Фарғона вилояти Фарғона тумани Водил қишлоғидаги савдо дўкони СВОЖЖДЛҚК департаментининг туман бўлими ва давлат солиқ инспексияси ходимлари томонидан текширувдан ўтказилди, деб хабар бермоқда «Ҳуқуқ» газетаси.
Тегишли тартибда давлат рўйхатидан ўтмай, махсус рухсатномага ҳам эга бўлмай, қонунга хилоф равишда алкоголли ичимликлар ва тамаки маҳсулотлари сотилаётган дўкондан 116 турдаги жами 10 миллион 538 минг сўмлик спиртли ичимликлар, тамаки ва озиқ-овқат маҳсулотлари ашёвий далил сифатида олиниб, белгиланган тартибда далолатнома тузилди.
Шунингдек, ашёвий далил сифатида олинган тўрт турдаги ароқ, бир неча турдаги коньяк ва винонинг истеъмолга яроқсизлиги, инсон ҳаёти ва соғлиғи талабларига жавоб бермаслиги аниқланди.
Муқаддам судланиб, амнистия актига асосан жазодан озод этилган судланувчининг астойдил пушаймонлиги, иккинчи гуруҳ ногирони эканлиги, оилавий шароити, яшаш жойида ижобий тавсифлангани этиборга олиниб, унга энг кам иш ҳақининг 50 баробари миқдорида жазо тайинланди. Суд ҳукмига биноан, ашёвий далил сифатида олинган 106 турдаги 10 миллион 145 минг сўмлик тамаки ва алкоголь маҳсулотлари йўқ қилинди.
Изоҳ (0)