Ўзбекистон ялпи ички маҳсулотидаги саноат улуши 2020 йилга бориб 27 фоизгача ортиши мўлжалланмоқда. Бу ҳақда 2015 йил 23 январда бўлиб ўтган Ўзбекистон Республикаси Олий Мажлиси Қонунчилик палатаси ва Сенатининг қўшма мажлисида тақдим этилган Ўзбекистон Республикаси Вазирлар Маҳкамасининг яқин муддатга ва узоқ истиқболга мўлжалланган Ҳаракат дастурида маълум қилинган. Дастур «Халқ сўзи» газетасида чоп этилган.
Аввал хабар берилганидек, 2015−2019 йилларда ишлаб чиқаришни таркибий ўзгартириш, модернизация ва диверсификация қилишни таъминлаш чора-тадбирлари дастурини тайёрлаш доирасида жами қиймати 38 миллиард долларга тенг бўлган 870 та йирик инвестиция лойиҳаси рўйхати шакллантирилди.
Дастлабки ҳисоб-китобларга кўра, дастурни амалга ошириш қуйидаги натижаларга эришиш имконини беради:
- машинасозлик, кимё, нефть-газ-кимё, тўқимачилик ва озиқ-овқат саноати каби юқори қўшимча қийматга эга бўлган маҳсулотлар ишлаб чиқарувчи тармоқлар жадал ривожлантирилади. Бунинг натижасида саноат маҳсулотларнинг 1000 тадан ортиқ янги турини ишлаб чиқариш ўзлаштирилади;
- саноат ишлаб чиқаришининг 5 йилда 1,5 баробарга ўсиши, саноатнинг ялпи ички маҳсулотдаги улуши эса 24 фоиздан 2020 йилгача бориб 27 фоизгача ортиши мўлжалланмоқда;
- юқори технологияли маҳсулотлар экспортини янада ошириш ва 52 мингтадан ортиқ янги иш ўрни яратиш назарда тутилмоқда.
Булар жумласига тайёр тўқимачилик буюмлари ва ярим-тайёр маҳсулотлар, полимерлар ва углеводородларни чуқур қайта ишлаш орқали олинадиган бошқа маҳсулотлар, электр-маиший ва электрон товарлар, маиший кимё товарлари, замонавий қурилиш ва пардозлаш материаллари, чарм-поябзал, озиқ-овқат ва фармацевтика саноати маҳсулотлари киради.
Изоҳ (0)