Тошкентнинг «Пахтакор» клуби Туркиядаги назорат ўйинида «Жетису»дан устун келди

Тошкентнинг «Пахтакор» клуби Туркиядаги йиғин доирасидан ўрин олган биринчи назорат ўйинида ғалаба қозонди, деб хабар бермоқда «Uff.uz».

Қозоғистоннинг «Жетису» клуби билан майдонга тушган «Пахтакор» 2:1 ҳисобида зафар қучди. Биринчи бўлимда устунлик кўпроқ тошкентликлар тарафида бўлди. 20-дақиқада Соҳибовнинг зарбасидан кейин тўп дарвоза устунидан қайтди. 35-дақиқада Ораховац ҳисобни очди. Аднан яқиндагина «Пахтакор» билан шартнома имзолаганди. Биринчи бўлим охирида рақиб ҳисобни тенглаштирди.

Иккинчи бўлимда Бабая таркибда бир неча ўзгариш амалга оширди. 49-дақиқада Андреевнинг зарбасидан кейин тўп «Жетису» футболчисига тегиб, дарвоза тўридан жой олди. Ушбу натижа ўйин охиригача ўзгармади. Кейинги назорат баҳсини «шерлар» 20 январь куни Россиянинг «Мордовия» жамоасига қарши ўтказади.

«Пахтакор» — «Жетису»: 2:1 (1:1)

Голлар: Ораховац 35, Андреев 49.

«Пахтакор»: Рибкин, Мерзляков, Тожиев (I. Абдуллаев, 75), Ораховац, Ҳошимов (Холмуҳаммедов, 76), Соҳибов (Ж. Ҳакимов, 79), Андреев (Махарадзе, 54), Исматуллаев (Козак, 62), Каримов (Раҳматуллаев, 46), Машарипов (Солиев, 66), Пардаев (Олимов, 57).