Бош прокуратура ҳузуридаги департаментнинг Сирдарё вилояти Боёвут туман бўлими томонидан 2014 йил 27 май куни тумандаги «Ғаллакор» ҚФЙ Ифтихор маҳалласида яшовчи фуқаронинг хонадонида ўтказилган тезкор тадбирда хонадон эгаси икки нафар қўшниси билан ноқонуний даромад топиш мақсадида яширин цех ташкил этганлиги аниқланди. Бу ҳақда Ўзбекистон Республикаси Бош Прокуратурасининг «Ҳуқуқ» нашри хабар бермоқда.
«Тадбиркорлар» ўзбошимчалик билан электр энергиясига уланиб, ёғ маҳсулотини қонунга хилоф равишда ишлаб чиқарган. Ифтихор маҳалласидаги фуқаро хонадонидаги жами 13 миллион 685 минг сўмлик мойжувоз ускунаси, 10 кг пахта чигити, 700 кг кунжара маҳсулоти, 200 литр пахта ёғига ўхшаш суюқлик, электрон тарози, 200 литр ҳажмдаги темир бочка ва бошқа ускуналар ашёвий далил сифатида олиб қўйилди.
Учовлоннинг ўзбошимчалик билан электр энергиясига уланганлиги натижасида Боёвут туман электр тармоқлари корхонаси манфаатларига 7 миллион 213 минг сўмлик зарар етказилгани аниқланди.
Бундан ташқари, ашёвий далил сифатида олинган 200 литр жувоз ёғи экспертиза хулосасига кўра истеъмолга яроқсиз экани маълум бўлди. Ўзбошимча «ишбилармонлар»га нисбатан суднинг ҳукми билан тегишли жазо тайинланди.
Изоҳ (0)