9 октябрь куни кечқурун муборак ҳаж сафаридан қайтаётган Ўзбекистон зиёратчиларининг дастлабки гуруҳлари кутиб олинди. Бу ҳақда Ўзбекистон Республикаси Вазирлар Маҳкамаси ҳузуридаги Дин ишлари бўйича қўмита хабар бермоқда.
Жорий йилнинг 9—20 октябрь кунлари ўзбекистонлик ҳожиларни «Ўзбекистон ҳаво йўллари» Миллий авиакомпанияси самолётларида Жидда — Тошкент, Жидда — Бухоро, Жидда — Фарғона, Жидда — Андижон, Жидда — Самарқанд, Жидда — Термиз, Жидда — Қарши ҳамда Жидда — Урганч йўналишлари бўйича Ўзбекистонга олиб келиш режалаштирилган.
Зиёратчиларни кутиб олиш Дин ишлари бўйича қўмита, Ўзбекистон мусулмонлари идораси, мутасадди вазирлик ва идоралар ҳамкорлигида амалга оширилмоқда.
Бугун, 10 октябрь, ўзбекистонлик зиёратчиларни навбатдаги икки рейсда, Жидда — Тошкент ва Жидда — Самарқанд йўналишлари бўйича кутиб олиш режалаштирилган.
Ҳожилар Ўзбекистонга кўтаринки кайфиятда қайтар экан, ўз хурсандчиликлари билан ўртоқлашди. «Биз Яратганга шукр айтишимиз керак. Обод ва озод юрт — Ўзбекистондан Мадина, Макка шаҳарларига бориб Ҳаж амалларини бажариб қайтдик.
Тошкентдан жўнаб кетганимиздан ҳозиргача ҳам ҳурмат, эъзоз, турли қулайликлар гувоҳи бўлиб турибмиз. Ишчи гуруҳ, шифокорлар томонидан бизга кўрсатилган хизматлар, ошпазлар тайёрлаб берган мазали таомлар, меҳмонхонадаги шароитлар ва бошқа барча хизматлар учун юртбошимиз бошчилигидаги барча мутасаддиларга миннатдорчилигимизни билдирамиз.
Биз юртимиз тинчлиги, обод ва фаровонлигини тилаб барча қадамжо, масжидлар ва Арафотда туриб дуолар қилдик», — деди Игамбердиева Маҳфуза.
Яна бир зиёратчи Мирзақулова Шарифа ҳам ўз фикрлари билан ўртоқлашди: «Бундай тартиб билан ташкил этилган зиёрат фақат таҳсинга сазовор. Ҳаммаси соат каби интизом ва тартиб билан бажарилди. Ишчи гуруҳнинг жойлардаги ҳаракатлари, гуруҳбошиларнинг ибодатларимизга берган аҳамияти, шифокорларнинг маҳорати, ошпазларнинг таомлари — ҳаммаси ўз вақтида, жойида бўлди. Нима десак, лаббай деб жавоб беришлари, ҳатто у ёқдаги маҳаллий аҳолининг очиқ чеҳралиги диққатга сазовор бўлди.
Бундай тартиб, бундай интизом, хизмат кўрсатган барча ходимларнинг биз зиёратчиларга бирдек эътибор бериши, Тошкентдан кетиб то қайтиб келгунимизгача бўлган барча шароит ва ўрнатилган тартиб, диққат ва эътибор учун аввало юртбошимиз, қолаверса, ҳукуматимизга ўз миннатдорчилигимизни билдирамиз. Юртимиз тинч ва обод бўлсин дея дуолар қиламиз».