Жанубий Кореянинг Инчеон шаҳрида давом этаётган Осиё ўйинлари — 2014 доирасидаги Ўзбекистон — Бангладеш учрашуви ниҳоясига етди. Иккинчи турдан ўрин олган мазкур ўйинда Миржалол Қосимов бошчилигидаги Ўзбекистон терма жамоаси Бангладешга қарши майдонга тушиб, йирик 3:0 ҳисобида ғалаба қозонди. Бу ҳақда Uff.uz хабар бермоқда.
Ўйин тўлиқ Ўзбекистон футболчилари устунлиги остида ўтди. Дастлабки дақиқаларданоқ олдинга ташланган Ўзбекистон терма жамоаси аъзолари рақиб дарвозаси олдида бир қатор хавфли вазиятларни яратди.
Ушбу учрашувда Миржалол Қосимов Гонконгга қарши ўйинга нисбатан ўзгаришлар ҳам қилган. Жумладан, аввалги ўйинда захирадан майдонга тушган Воҳид Шодиев бугунги ўйинни асосий таркибда бошлади. Айнан Шодиев учрашувда ҳисобни очганини ҳам алоҳида таъкидлаб ўтиш зарур. У 14-дақиқада дарвозадан қайтган тўпга биринчи бўлиб етиб келиб, аниқ зарба билан ҳисобни очди.
21-дақиқага келиб, Шодиев учрашувда дубл қайд этди. У Сардор Рашидов томонидан чап қанотдан ошириб берилган узатмани боши билан дарвозага йўллаб, ҳисобни 2:0 кўринишига олиб келди. 34-дақиқага келиб, Рашидовнинг ўзи катта саҳнага чиқди. Жамшид Искандаров жарима зарбасини тўғри Рашидов оёғига ташлаб берди. Сардор эса тўпни тўхтатмасдан чап оёқда дарвозага йўллади. Ушбу гол мухлисларга Зайниддин Зиданнинг «Реал» таркибида Чемпионлар лигаси финалида киритган голини эслатиб юборган бўлса, ажаб эмас.
Биринчи бўлимнинг ўзида Ўзбекистон вакилларида гол киритиш учун яна бир қатор қулай вазиятлар бўлди. Аммо улар ушбу вазиятлардан унумли фойдалана олмади. Иккинчи бўлим ҳам тўлиқ Ўзбекистон термаси устунлиги остида ўтди. Бангладеш терма жамоаси аъзолари аҳён-аҳёнда қарши ҳужумда ўз омадини синаб кўришга ҳаракат қилди. Аммо бу вазиятларда Ўзбекистон дарвозабони Элдор Суюнов ниҳоятда ишончли ҳаракат қилди. 3:0 ҳисоби ўйин охирига қадар ўзгармай қолди.
Шу тариқа Ўзбекистон терма жамоаси гуруҳдаги иккинчи ўйинда йирик ҳисобда ғалаба қозониб, биринчи ўринга кўтарилиб олди. Навбатдаги учрашувни Ўзбекистон терма жамоаси 22 сентябрь куни Афғонистон термасига қарши ўтказади.
Ўзбекистон — Бангладеш: 3:0
Голлар: Воҳид Шодиев, 14, 21, Сардор Рашидов, 34
Ўзбекистон: Элдорбек Суюнов — Ислом Тўхтахўжаев, Егор Кримец, Даврон Ҳошимов — Сардор Рашидов, Фозил Мусаев, Владимир Козак, Фарруҳ Сайфиев, Жамшид Искандаров — Игор Сергеев, Воҳид Шодиев.
Бангладеш: Райҳон Ҳасан, Кастро Кумар, Ёсин Хон, Жамол Бхуён, Соҳил Рана, Мамунул Ислом, Винсент Бизвас, Топу Барман, Расул Маҳмуд, Човдури Мунна, Токлис Аҳмад
Изоҳ (0)