Пойтахтдаги Эски жўва деҳқон бозорига декларациясиз ва истеъмолга яроқли эканлигини тасдиқловчи ҳужжатларсиз, қўлбола усулда Қозоғистон Республикасида ишлаб чиқарилган спиртли ичимликларни олиб кетаётган аёл қўлга олинди. «Ҳуқуқ» газетасининг хабар беришича, аёл умумий нархи 4,2 миллион сўмлик 300 литр спиртли ичимлик билан Ўзбекистон Республикаси Бош прокуратураси ҳузуридаги Солиқ, валютага оид жиноятларга ва жиноий даромадларни лэгаллаштиришга қарши курашиш (СВОЖЖДЛҚК) департаментининг Шайхонтоҳур туман бўлими ходимлари томонидан ушланган.
Суд томонидан фуқаро Нодира Эгамназарова (исм-фамилия «Ҳуқуқ» газетаси томонидан ўзгартирилган)га нисбатан қонуний жазо тайинланган.
«Энг муҳими, бу каби ҳолатларнинг аниқланиши юртимизда инсонлар саломатлиги ва ҳаётини муҳофаза қилишга алоҳида эътибор қаратилганидан далолат беради. Зеро, жиноятчилик ва ҳуқуқбузарликка қарши курашиш ҳар биримизнинг бурчимиздир», — дейди мақола муаллифи, СВОЖЖДЛҚК департаментининг бўлим катта суриштирувчиси Улуғбек Мамаражабов.
Изоҳ (0)